नंदुरबार जिल्ह्यातील नवापूर शहरात बर्ड फ्लूचा प्रादुर्भाव वाढत असल्याने प्रशासनाने कठोर पावले उचलली आहेत. या पार्श्वभूमीवर शहरातील चिकन दुकाने, बिर्याणी सेंटर्स तसेच अंडी विक्रीवर तात्काळ बंदी घालण्यात आली आहे. नवापूर नगरपरिषदेने दिलेल्या या आदेशाचे उल्लंघन करणाऱ्या व्यावसायिकांवर थेट कायदेशीर कारवाई करण्यात येणार असल्याचे स्पष्ट करण्यात आले आहे.

बर्ड फ्लूचा संसर्ग रोखण्यासाठी प्रशासनाने युद्धपातळीवर उपाययोजना सुरू केल्या आहेत. अवघ्या दोन दिवसांत सुमारे 44 हजार पक्ष्यांचे कलिंग करण्यात आले असून, एकूण 1 लाख 40 हजार कोंबड्या नष्ट करण्याची प्रक्रिया सुरू आहे. या मोहिमेसाठी सुमारे 50 कर्मचाऱ्यांचे विशेष पथक दिवस-रात्र कार्यरत असून, संसर्गाचा फैलाव रोखण्यासाठी सर्वतोपरी प्रयत्न केले जात आहेत.

या अचानक घेतलेल्या निर्णयामुळे स्थानिक पोल्ट्री व्यवसायाला मोठा फटका बसला आहे. दररोज सुमारे 50 लाख रुपयांचे नुकसान होत असल्याचा अंदाज व्यक्त केला जात आहे. याशिवाय, 20 हजार अंडी आणि तब्बल 44 टन पशुखाद्यही नष्ट करण्यात आले आहे. त्यामुळे पोल्ट्री व्यवसायिकांचे कंबरडे मोडले असून, अनेकांच्या उपजीविकेवर संकट आले आहे.

चिकन विक्रेते आणि बिर्याणी सेंटर चालकांना या बंदीचा मोठा आर्थिक फटका बसला आहे. अचानक लागलेल्या निर्बंधांमुळे त्यांचा साठा वाया गेला असून, व्यवसाय पूर्णपणे ठप्प झाला आहे. दुसरीकडे, चिकन आणि अंडी विक्रीवर बंदी आल्यामुळे मांसाहार प्रेमींमध्येही नाराजीचे वातावरण निर्माण झाले आहे. दरम्यान, प्रशासनाने नागरिकांना अफवांवर विश्वास न ठेवण्याचे आणि आवश्यक ती काळजी घेण्याचे आवाहन केले आहे. परिस्थिती नियंत्रणात आणण्यासाठी सर्व यंत्रणा सज्ज असून, नागरिकांच्या सहकार्याचीही आवश्यकता असल्याचे प्रशासनाकडून सांगण्यात आले आहे.