धबधबा किंवा निसर्गरम्य काही ठिकाणी फिरण्यासाठी गेल्यावर तेथे अनेक प्राणी तसेच पक्षी असतात. असे प्राणी किंवा पशू -पक्षी केव्हा आपल्यावर हल्ला करतील काही सांगता येत नाही. त्यामुळे सतर्क राहणे गरजेचे असते. अशात नाशिकमध्ये धबधब्यावर फिरण्यासाठी गेलेल्या काही पर्यटकांवर अशाच पद्धतीने मधमाशांचा हल्ला झाला आहे.

नाशिकच्या हरिहर गड परिसरातील प्रसिद्ध शीतकडा धबधबा पाहण्यासाठी गेलेल्या पर्यटकांवर मधमाशांनी हल्ला केला आहे. रविवारी दुपारी बाराच्या सुमारास पर्यटकांवर अचानक मधमाशांचा हल्ला झाला. या हल्ल्यात चार ते पाच पर्यटक किरकोळ जखमी झालेत.

ट्रेक लिडरच्या योग्य नियोजनामुळे आणि अनुभवामुळे या पर्यटकांवरील मोठा धोका टळला आहे. रविवारी नाशिकहून हिमऑरडील या ट्रेकींग संस्थेतर्फे हरीहर गड परिसरातील प्रसिद्ध शीतकडा धबधबा पाहण्यासाठी काही पर्यटक गेले होते. त्यावेळी दुपारी साधारण १२ वाजेच्या सुमारास मधमाशांनी अचानक त्यांच्यावर हल्ला केला.

या हल्लात ४-५ पर्यटक किरकोळ जखमी झाले. मधमाशांचा हल्ला झाल्यानंतर ट्रेक लिडर आणि त्यांच्या संपूर्ण टिमने योग्य वेळी खबरदारी घेत सर्वांना जमीनीवर झोपण्यास सांगितले. जमिनीवर झोपलेले असताना कोणत्याही प्रकारे हालचाल करू नका अशा सूचना दिल्या. पर्यटकांनी सुद्धा या सूचनांचे पालन केल्याने मोठी हानी टळली.

तब्बल २०-२५ मिनिटं या मधमाशा पर्यटकांच्या डोक्यावर आणि अंगाभोवती घिरट्या घालत होत्या. काही ट्रेकर्सने वेखंडाच्या पावडरचा उपयोग करून मधमाशांना दूर पळून लावल्याने धोका टळला.

हरिहर गडावर कसं पोहचाल

दरवर्षी हरिहर किल्ल्यावर फिरण्यासाठी येथील आसपासच्या निसर्गाचा आनंद लुटण्यासाठी अनेक पर्यटक येथे भेट देतात. या किल्ल्याला हर्षगढ़ असंही म्हटलं जातं. हा किल्ला नाशिक शहरापासून ४० किमी अंतरावर आहे. नाशिक स्थानकातून तुम्ही बसने सुद्धा येथे पोहचू शकता. इगतपुरीपासून किल्ला ४८ किमी अंतरावर आहे. तर घोटीपासून हा किल्ला ४० किमी अंतरावर आहे.