नाशिक, ता. १२ जून २०२४

लोकसभा निवडणुकानंतर राज्यात विधानसभा निवडणुकांची रणधुमाळी सुरू झाली आहे. नाशिक शिक्षक मतदार संघाच्या निवडणुकीसाठी आज अर्ज माघारी घेण्याचा शेवटचा दिवस असून अपक्ष अर्ज भरलेले राधाकृष्ण विखे पाटील यांचे बंधु राजेंद्र विखे पाटील यांच्या निर्णयाकडे महायुतीच्या नेत्यांचे लक्ष लागले आहे.

नाशिक शिक्षक मतदार संघाच्या निवडणुकीसाठी आज अर्ज माघारीचा शेवटचा दिवस आहे. नाशिक शिक्षक मतदार संघासाठी महाविकास आघाडीकडून ठाकरे गटाचे संदीप गुळवे आणि काँग्रेसचे दिलीप पाटील यांनी उमेदवारी अर्ज भरला आहे. तर भाजप नेते राधाकृष्ण विखे पाटील यांचे बंधू राजेंद्र विखे पाटील, भाजप नेते विवेक कोल्हे आणि भाजपचे पदाधिकारी धनराज विसपुते यांनी भरलेत अपक्ष उमेदवारी अर्ज दाखल केले आहेत.

आज अर्ज माघार घेण्याचा शेवटचा दिवस असल्याने भाजप नेते राधाकृष्ण विखे पाटील यांचे बंधू राजेंद्र विखे पाटील यांच्या माघारीसाठी भाजपच्या वरिष्ठ पातळीवरून प्रयत्न सुरु असल्याचे सांगण्यात येत आहे. त्यामुळे विखे पाटील काय निर्णय घेणार? याकडे सर्वांचे लक्ष लागले आहे.

दरम्यान, नाशिक शिक्षक मतदार संघांसाठी महायुतीकडून शिंदेंच्या शिवसेनेचे किशोर दराडे यांनी उमेदवारी अर्ज दाखल केला आहे. राजेंद्र विखे पाटील यांनी माघार घेतल्यास महायुतीच्या उमेदवाराला फायदा होणार आहे. त्यामुळे विखे पाटील काय भूमिका घेणार? याकडे सर्वांचे लक्ष लागले आहे.