फैयाज शेख, साम टीव्ही

शहापूर : नाशिक-मुंबई महामार्गावरील नवीन कसारा घाटात रविवारी (ता. ६) रात्रीच्या सुमारास चार वाहनांचा विचित्र अपघात झाला. सुसाट वेगात असलेल्या कंटेनरने ४ वाहनांना जोरदार धडक दिली. अपघात इतका भीषण होता की, चारही वाहनांचा चक्काचूर झाला. या दुर्घटनेत तिघे गंभीर जखमी झाले आहेत. जखमींमध्ये दोन लहान मुलांचा समावेश आहे.

जखमींपैकी तिघांचीही प्रकृती चिंताजनक असून त्यांना उपचारासाठी कसारा येथील रुग्णालयात पाठवण्यात आलं आहे. कंटेनरचा ब्रेक फेल झाल्याने हा अपघात झाला, अशी माहिती पोलिसांनी दिली आहे. मागील काही दिवसांपासून नवीन कसारा घाटात सातत्याने अपघाताच्या घटना घडत आहेत. अवघड वळणे असल्याने घाटात ट्रक, कंटेनर चालकाचे नियंत्रण सुटून मोठ मोठे अपघात होत आहेत.

रविवारी रात्रीच्या सुमारास नवीन कसारा घाटात पुन्हा विचित्र अपघात झाला. नाशिकहून मुंबईच्या दिशेने जाणाऱ्या कंटेनरचा अचानक ब्रेक फेल झाल्याने कंटेनरने ४ वाहनांना जोरदार धडक दिली. या भीषण अपघातात कंटेनर चालक आणि कारमधील एक लहान मुलगा वाहनांच्या मध्यभागी अडकून पडले होते.

अपघाताची माहिती मिळताच पोलिसांनी घटनास्थळी धाव घेतली. तब्बल १ तासांच्या अथक प्रयत्नानंतर जखमींना बाहेर काढण्यात आले. पुढील उपचारासाठी त्यांना रुग्णालयात दाखल करण्यात आले. अपघातानंतर घाटात प्रचंड वाहतूक कोंडी झाली होती. ही कोंडी सोडवताना पोलिसांची चांगलीच दमछाक झाली.

माळशिरस जवळील अपघातात ४ जणांचा मृत्यू

माळशिरस तालुक्यातील कारूंडे गावाजवळ कार आणि टेम्पोचा समोसमोर भीषण अपघात झाला. यामध्ये चार‌ जणांचा मृत्यू झाला. अपघाताची ही घटना रविवारी सकाळी ६ वाजेच्या सुमारास घडली. अपघातील मृत व्यक्ती हे इंदापूर तालुक्यातील लासुर्णे येथील कामगार होते. सर्वजण कास पठार पाहण्यासाठी कारने साताऱ्याच्या दिशेने जात होते. त्यावेळी समोरून सुसाट वेगात येणाऱ्या टेम्पोने त्यांच्या कारला जोरदार धडक दिली.