हवामान विभागाने दिलेल्या अतिवृष्टीच्या (Heavy Rain Alert) इशाऱ्याच्या पार्श्वभूमीवर नाशिक महापालिकेने मोठा निर्णय घेतला आहे. विद्यार्थ्यांची सुरक्षितता लक्षात घेऊन नाशिक शहरातील सर्व शाळा आणि महाविद्यालयांना उद्या सुट्टी जाहीर करण्यात आली आहे. नाशिक महापालिकेच्या आयुक्त मनीषा खत्री यांनी याबाबतचे अधिकृत आदेश जारी केले आहेत. पावसाचा जोर आणि संभाव्य पूरस्थिती पाहता पालकांनी आणि विद्यार्थ्यांनी आवश्यक ती काळजी घ्यावी, असे आवाहनही प्रशासनाकडून करण्यात आले आहे.

पुढील ४८ तासांत नाशिकमध्ये मुसळधार ते अतिमुसळधार पावसाची शक्यता वर्तवण्यात आली आहे. हाच धोका ओळखून प्रशासनाने खबरदारीचा उपाय म्हणून हे पाऊल उचललं आहे. महापालिका क्षेत्रात येणाऱ्या सर्व माध्यमांच्या (मराठी, इंग्रजी, हिंदी इ.) आणि सर्व व्यवस्थापनांच्या प्राथमिक, माध्यमिक शाळा तसेच कनिष्ठ व वरिष्ठ महाविद्यालयांना ही सुट्टी लागू असणार आहे, असे पालिका आयुक्तांनी काढलेल्या परिपत्रकात स्पष्ट करण्यात आले आहे.