नाशिक जिल्ह्यात पुढील काही तासांत अतिमुसळधार पाऊस होण्याची शक्यता आहे. त्र्यंबकेश्वर, इगतपुरी आणि नाशिक शहराच्या पश्चिम भागात अत्यंत मुसळधार पाऊस पडण्याची शक्यता हवामान विभागाने वर्तवलीय.तर काही भागात ⁠ढगफुटी होऊ शकते. जवळपास 300 मिमी पाऊस होऊ शकतो. त्यामुळे ⁠नाशिकमधील शाळा आणि महाविद्यालयांना सुट्टी देण्यात आली आहेत. दरम्यान पावसाचे अलर्ट ⁠8 तारखेपर्यंत असल्यानं,नागरिकांनी अनावश्यक घराबाहेर पडू नये. गरज असेल तरच घराबाहेर पडावे, असे आवाहन मुख्यमंत्री फडणवीस यांनी केले आहे.

दरम्यान काही ठिकाणी ढगफुटीसदृश परिस्थिती निर्माण होण्याची शक्यता असल्यानं जिल्हा प्रशासनाने नागरिकांना सतर्क राहण्याचे आवाहन केले आहे. नाशिकचे जिल्हाधिकारी यांनी परिस्थितीचा आढावा घेतला. हवामान विभागाकडून मिळणाऱ्या माहितीनुसार प्रशासन सातत्याने परिस्थितीवर लक्ष ठेवून आहे. राज्य सरकारच्या सूचनांनुसार आपत्कालीन यंत्रणाही सज्ज ठेवण्यात आल्याची माहिती जिल्हाधिकाऱ्यांनी दिली आहे.

त्र्यंबकेश्वर आणि सप्तशृंगी मंदिर भाविकांसाठी बंद

अतिवृष्टीचा इशारा देण्यात आल्यानं भाविकांच्या सुरक्षेच्या दृष्टीने एक महत्त्वाचा निर्णय घेण्यात आलाय. त्र्यंबकेश्वर मंदिर पुढील दोन दिवस दर्शनासाठी बंद ठेवण्याचा निर्णय घेण्यात आला आहे. नियोजित पूजा विधी पार पडल्यानंतर मंदिरात भाविकांना प्रवेश दिला जाणार नाही. यासह सप्तशृंगी गडावरील दर्शन व्यवस्थाही तात्पुरती बंद ठेवण्यात आली आहे. भाविकांनी या कालावधीत प्रवास टाळावा, असे आवाहन प्रशासनाकडून करण्यात आले आहे.

अतिवृष्टीच्या इशाऱ्यामुळे नाशिक ग्रामीण, त्र्यंबकेश्वर आणि इगतपुरी तालुक्यातील सर्व शाळा आणि महाविद्यालयांना सुट्टी देण्यात आली आहे. तसेच या भागातील आठवडी बाजारही बंद ठेवण्याचा निर्णय प्रशासनाने घेतला आहे. यासह प्रशासनाने शेतकऱ्यांना शेतात न जाण्याचा सल्लाही दिला आहे.

जिल्हा प्रशासनाने पूराचा धोका असलेल्या गावांची यादी तयार करण्याचे काम सुरू केले आहे. अपत्कालीन परिस्थिती उद्भवल्यास तातडीने मदत पोहोचवण्यासाठी यंत्रणा सज्ज ठेवण्यात आली आहे. ज्या ठिकाणी दरड कोसळण्याचा किंवा पूर येण्याचा धोका आहे, अशा रस्त्यांची पाहणी सुरू आहे.