अजय सोनवणे 

मनमाड (नाशिक) : नाशिक जिल्ह्यात यंदा हवा तसा पाऊस अद्याप झालेला नाही. यामुळे शेतातील पिके वाचविण्यासोबत पाणी टंचाईचे संकट उभे आहे. याच दरम्यान नाशिक जिल्ह्यातील मालेगावमध्ये पाणी टंचाई निर्माण झाल्याचे दिसून येत आहे. यामुळे मालेगावमध्ये पाणी कपातीचा निर्णय घेण्यात आला असून आता २७ जुलैपासून तीन दिवसांआड पाणी पुरवठा केला जाणार आहे.

राज्यात सर्वत्र जोरदार पाऊस होत असताना (Nashik) नाशिक जिल्ह्यात यंदा हवा तसा पाऊस अद्याप झालेला नाही. यात नाशिकच्या मालेगाव शहराला पाणी पुरवठा करणाऱ्या चणकापुर व गिरणा धरण क्षेत्रात अद्याप जोरदार पाऊस झालेला नाही. पाऊस न झाल्याने या धरणांमधील आरक्षित पाणी साठा देखील संपुष्टात आला असून ऑगस्ट अखेरपर्यंत पुरेल एवढा पाणीसाठा धरणात शिल्लक असल्याने (Malegaon) मालेगाव वर पाणी टंचाईचे संकट घोंगावत आहे.

आगामी काळात दमदार पाऊस न झाल्यास पाणी टंचाईची तीव्रता अधिक तीव्र होण्याची भीती आहे. यामुळे महापालिका प्रशासनाने आता मालेगाव शहराच्या पाणी पुरवठ्यात कपात करण्याचा निर्णय घेतला आहे. शहरात (Water Scarcity) शनिवारपासून तीन दिवसांआड पाणी पुरवठा करण्याचा निर्णय महापालिका प्रशासनाने घेतला आहे. मालेगाव महापालिकेच्या इतिहासातील पहिल्यांदाच पाणी कपात करण्यात आली आहे. नागरिकांनी पाणी जपून वापरण्याची आवाहन आयुक्त रवींद्र जाधव यांनी केले.