नाशिक : विधानसभा निवडणुकीसाठी मतदान होत नाशिकच्या इगतपुरी मतदारसंघातील तळेगाव येथे गोंधळ उडाला आहे. यात मतदान केल्यानंतर मशीनवरील बटन दाबले असता ते दुसऱ्याच उमेदवाराला मतदान जात असल्याचा प्रकार होत आहे. यामुळे या केंद्रावरील मतदान प्रक्रिया काही वेळ थांबविण्यात आली आहे.

विधानसभा निवडणुकीसाठी (Vidhan Sabha Election) राज्यात आज मतदान होत आहे. सकाळी सात वाजेपासून मतदानाला सुरवात झाली असून राज्यातील अनेक मतदान केंद्रांवर मशीनमध्ये बिघाड झाल्याचे पाहण्यास मिळाले आहे. मात्र (Nashik News) नाशिकच्या इगतपुरी मतदारसंघातील तळेगाव येथील मतदान केंद्रावर मतदान केलेल्या उमेदवाराला मतदान न जाता दुसऱ्या उमेदवाराला जात असल्याचा आरोप करण्यात येत आहे. यामुळे इगतपुरी मतदारसंघातील तळेगाव येथे गोंधळ उडाला आहे. 

दरम्यान नागरिकांच्या तक्रारीनंतर इगतपुरी विधानसभा मतदारसंघातील तळेगाव येथे घडलेली घटना चर्चेत आली आहे. दुसऱ्या उमेदवाराला मतदान होत असल्याच्या नागरिकांच्या तक्रारीमुळे काही काळ मतदान थांबविण्यात आले आहे. निवडणूक आयोगाचे अधिकारी आणि स्थानिक पोलीस प्रशासन मतदान केंद्रावर दाखल झाले असून, निवडणूक निर्णय अधिकाऱ्यांकडून चौकशी सुरू करण्यात आली आहे.