तबरेज शेख 
नाशिक : सध्या ठिकठिकाणी चोरीच्या घटनांमध्ये वाढ झाली आहे. यात चोरटयांनी आता मंदिर देखील टार्गेट केले आहे. मंदिरातील दानपेटी फोडून तेथील रक्कम लांबवत आहेत. त्याच नुसार नाशिकच्या कपालेश्वर मंदिर परिसरातून दानपेटी चोरून नेल्याची घटना घडली आहे. घर दुपारच्यावेळी दानपेटी चोरून नेल्याच्या घटनेने खळबळ उडाली आहे. 

चोरट्यांकडून मंदिरात देखील चोरी करण्यास सुरवात केली आहे. कधी मंदिरातील दानपेटी फोडून रक्कम लांबविली जाते. तर कधी थेट दानपेटीत घेऊन जातात. तर मंदिरातील पितळी घंटा, देवावरची दागिने चोरून नेट असल्याचे प्रकार देखील समोर आले आहेत. त्यानुसारच नाशिकच्या कपालेश्वर मंदिर परिसरात असलेल्या मारुती मंदिरातील दानपेटी भर दुपारी एका तरुणाने चोरून नेली आहे. विशेष म्हणजे रस्त्यावर मंदिर असून येथे वर्दळ असताना दानपेटी चोरीला गेली आहे. 

मंदिरात सुरु होती पैसे मोजणी 

भर दुपारी मारुती मंदिरातील दानपेटी चोरी झाली यावेळी जवळच असलेल्या कपालेश्वर मंदिरात पोलीस, सरकारी अधिकारी आणि मंदिर ट्रस्टी यांच्या उपस्थित दान पेटीमधले भाविकांनी टाकलेल्या रक्कमेची मोजणी सुरू होती. याच वेळी मंदिर परिसरातून छोटी दान पेटी चोरीला गेली आहे. मारुती दर्शनाला मंदिरात येणाऱ्या भाविकांना दानपेटी न दिसल्याने हा प्रकार समोर आला. याबाबत पोलिसांना माहिती देण्यात आली. 

अगोदर घेतले दर्शन

दरम्यान संपूर्ण घटना मंदिरात लावण्यात आलेल्या सिसिटीव्ही कॅमेरेत कैद झाली आहे. या सीसीटीव्हीमध्ये दिसत असलेल्या व्हिडिओमध्ये पांढरा शर्ट व पांढरी टोपी घातलेल्या तरुणांने मंदिरातून दान पेटी चोरी केली आहे. अगोदर या तरुणाने मारुतीचे दर्शन घेतले. यानंतर थोडा वेळ उभा राहून संधी मिळताच दानपेटी उचलून फरार झाला. याबाबत पंचवटी पोलीस ठाण्यात गुन्हा दाखल करण्यात आलं आहे.