Summary -

• नाशिकमध्ये मनसेच्या बड्या महिला नेत्या सुजाता डेरे यांचा राजीनामा

• सुजाता डेरे आज भाजपमध्ये प्रवेश करणार

• एबी फॉर्म देऊन देखील घेतली माघार

• पालिका निवडणुकीआधी मनसेसाठी मोठा धक्का

नाशिक महानगर पालिका निवडणुकीच्या रणधुमाळीत मोठी राजकीय घडामोड घडली. नाशिकमध्ये एबी फॉर्म देण्यावरून सर्वच राजकीय पक्षांमध्ये नाराजीनाट्य पाहायला मिळाले. एबी फॉर्म न मिळाल्यामुळे नाराज होत अनेक बड्या नेत्यांनी आणि पदाधिकाऱ्यांनी बंडखोरी करत पक्षाची साथ सोडली. अशात नाशिकमध्ये मनसे अध्यक्ष राज ठाकरे यांना धक्का बसला आहे. मनसेच्या बड्या महिला नेत्याने पक्षाची साथ सोडली असून त्या भाजपमध्ये पक्षप्रवेश करणार आहेत. त्यामुळे पालिका निवडणुकीदरम्यान नाशिकमध्ये मनसेसाठी हा मोठा धक्का असल्याची चर्चा होत आहे.

नाशिकमध्ये मनसेच्या माजी नगरसेविका सुजाता डेरे यांनी पक्षाला जय महाराष्ट्र केला. सुजाता डेरे या लवकरच भाजपमध्ये पक्षप्रवेश करणार आहेत. सुजाता डेरे यांनी नाशिकमधून मनसेकडून उमेदवारी अर्ज दाखल केला होता. पक्षाने एबी फॉर्म देऊनही सुजाता डेरे यांनी माघार घेतली होती. त्यांनी अचानक माघार का घेतली? याबाबत नाशिकच्या राजकीय वर्तुळात संभ्रम सुरू आहे. मात्र आज सुजाता डेरे भाजपमध्ये प्रवेश करणार आहेत. त्यामुळे हा मनसेसाठी मोठा धक्का आहे. भाजपचे प्रदेशाध्यक्ष रवींद्र चव्हाण आणि मंत्री गिरीश महाजन यांच्या उपस्थितीत सुजाता डेरे भाजपचे कमळ हाती घेणार आहे.

तर दुसरीकडे, भाजप बंडखोरांविरोधात अॅक्शन मोडमध्ये आले आहे. भाजपने बंडखोरी करणाऱ्या पदाधिकाऱ्यांची पक्षातून हकालपट्टी केली आहे. कल्याण-डोंबिवली महानगरपालिका निवडणुकीच्या पार्श्वभूमीवर भाजपने बंडखोरांविरुद्ध कठोर पाऊल उचललंय. बंडखोरी करणाऱ्या ७ पदाधिकाऱ्यांची भाजपने पक्षातून हकालपट्टी केली. अर्जुन म्हात्रे, विनिता म्हात्रे आणि नवनाथ पाटील यांच्यासह सात पदाधिकाऱ्यांची पक्षातून हकालपट्टी करण्यात आली. भाजप जिल्हाध्यक्ष नंदू परब यांनी ही कारवाई केली.