अजय सोनावणे, साम टीव्ही, प्रतिनिधी

Nashik Malegaon News : नाशिकच्या मालेगाव येथून एक धक्कादायक घटना समोर आली आहे. मालेगावमध्ये एका व्यक्तीने आपल्या पोटच्या चार वर्षीय मुलीला गिराणा नदीच्या वाहत्या पाण्यात फेकले. या व्यक्तीने पाण्यात उडी मारत स्वत: देखील आत्महत्या करण्याचा प्रयत्न केला. या एकूण प्रकारामुळे परिसरात मोठी खळबळ उडाली आहे.

मिळालेल्या माहितीनुसार, नाशिक जिल्ह्यातील मालेगाव येथे बापाने आपल्या पोटच्या पोरीला गिराणा नदीपात्राता फेकून दिले. त्यानंतर चार वर्षीय मुलीच्या बापाने स्वत:चे जीवन संपवण्याचा प्रयत्न केला. ही घटना मालेगावच्या टेहरे चौफुलीवरील गिरणा नदीपात्राजवळ घडली आहे. कौटुंबिक वादातून हा प्रकार घडल्याचे म्हटले जात आहे.

मुलीला नदीच्या पाण्यात फेकत स्वत: आत्महत्या करणाऱ्या व्यक्तीच्या घरात प्रचंड वाद सुरु असल्याची प्राथमिक माहिती आहे. कौटुंबिक वादातून त्याने हा टोकाचा निर्णय घेतल्याचे म्हटले जात आहे. बायको आपल्या मुलीकडे लक्ष देत नसल्याच्या रागातून या व्यक्तीने ही धक्कादायक कृती केल्याचा अंदाज वर्तवला जात आहे.

एका व्यक्तीने मुलीला नदीत फेकून स्वत: आत्महत्येचा प्रयत्न केल्याचे स्थानिक तरुणांनी पाहिले. हा प्रकार लक्षात आल्यानंतर या तरुणांनी गिरणा नदीपात्रामध्ये उड्या मारल्या आणि मुलीसह तिच्या बापाला वाचवले. मुलीला स्थानिक शासकीय रुग्णालयात दाखल करण्यात आले असून तिची प्रकृती स्थिर असल्याचे म्हटले जात आहे. या प्रकरणी मुलीच्या बापाला पोलिसांनी ताब्यात घेतले आहे.