Cricketer Death : कार अपघातात प्रसिद्ध क्रिकेटपटूचे निधन, किक्रेटविश्वावर शोककळा

Farid Hussain Death : क्रिकेट विश्वातून एक दु:खद बातमी समोर आली आहे. क्रिकेटपटू फरीद हुसेन यांचे निधन झाले आहे. जम्मू आणि काश्मीरमध्ये त्यांच्या दुचाकीचा अपघात झाला होता. अपघातामुळे त्यांचा मृत्यू झाल्याचे म्हटले जात आहे. फरीद हुसेन यांच्या निधनाच्या बातमीमुळे क्रिकेट विश्वावर शोककळा पसरली आहे.

मिळालेल्या माहितीनुसार, जम्मू आणि काश्मीरच्या पूंछ जिल्ह्यातील क्रिकेटपटू फरीद हुसेन यांचे रस्ते अपघातात निधन झाले आहे. २० ऑगस्ट रोजी फरीद हुसेन यांचा अपघात झाला होता. अपघातात ते गंभीररित्या जखमी झाले होते. हा अपघाताचा थरार सीसीटीव्ही कॅमेऱ्यामध्ये कैद झाला. अपघाताचे सीसीटीव्ही फुटेज सोशल मीडियावर व्हायरल झाले आहे.

फरीद हुसेन हे त्यांच्या दुचाकीवर प्रवास करत होते. रस्त्यावर जात असताना समोरच्या कारमधील एका व्यक्तीने अचानक कारचा दरवाजा उघडला. त्याचदरम्यान हुसेन हे कारजवळून जात होते. त्यांच्या दुचाकीची कारच्या दाराला टक्कर झाली. टक्कर झाल्याने ते लगेच जमिनीवर पडले. आसपासच्या लोकांनी त्यांची मदत केली. अपघातामध्ये फरीद हुसेन गंभीररित्या जखमी झाले होते. यात त्यांचा मृत्यू झाला.

फरीद हुसेन हे एक हुशार क्रिकेटपटू होते. त्यांच्या प्रदेशातील अनेक तरुण खेळाडूंसाठी ते प्रेरणास्थान होते. फरीद हुसेन यांच्या निधनामुळे संपूर्ण परिसरात हळहळ व्यक्त केली जात आहे. याआधीही ऑस्ट्रेलियन दिग्गज क्रिकेटपटू अँड्र्यू सायमंड्स यांचे कार अपघातात निधन झाले होते. भारताचा युवा क्रिकेटपटू रिषभ पंतचाही कार अपघात झाला होता. अपघातात रिषभ थोडक्यात वाचला होता.