तबरेज शेख 

नाशिक : लोकसभा निवडणुकीची मतमोजणी होत असताना अनेक ठिकाणी आता चित्र स्पष्ट होऊ लागले आहे. यात नाशिक लोकसभा मतदार संघात शिवसेनेच्या ठाकरे गटाच्या उमेदवाराला १ लाखापेक्षा अधिकचे मताधिक्य मिळाल्याने कार्यकर्त्यांनी गुलाल उधळत जल्लोष करण्यास सुरवात केली आहे. 

लोकसभा निवडणुकीची मतमोजणी (Lok Sabha Results) होत असून दुपारी १२ वाजेपर्यंत अनेक लोकसभा मतदार संघातील चित्र स्पष्ट होत झाले आहे. मतमोजणीच्या सात- आठ फेऱ्या पूर्ण झाल्यानंतर आघाडी मिळाल्यानंतर कार्यकर्त्यांकडून जल्लोष करण्यास सुरवात करण्यात आली आहे. त्यानुसार नाशिक लोकसभेच्या (Nashik Lok Sabha) जागेवर शिवसेना ठाकरे गटाचे राजाभाऊ वाजे एक लाखापेक्षा अधिक मताधिक्याने आघाडीवर असल्याने नाशिकमध्ये शिवसेनेकडून जल्लोष साजरा करण्यात येत आहे.  

ढोल वाजवत जल्लोष 

शिवसेना (Shiv Sena) ठाकरे गटाच्या कार्यकर्त्यांनी विजयाचा गुलाल उधळून आणि ढोल वाजून जल्लोष करण्यास सुरवात केली आहे. यावेळी शिवसेनेचे उमेदवार राजाभाऊ वाजे यांनी प्रतिक्रिया देताना महाविकास आघाडीने टाकलेला विश्वास जनतेने सार्थ केला असून जबाबदारी वाढल्याचे म्हटले.