नाशिक, ता. २० जून २०२४

नाशिकमधून एक भीषण अपघाताची घटना समोर आली आहे. नाशिकच्या सिन्नर शिर्डी महामार्गावर पिकअप गाडी उलटून मोठा अपघात झाला. या अपघातात २ महिला मजुरांचा मृत्यू तर २० जण जखमी झाले आहेत. अपघातातील जखमींना रुग्णालयात दाखल करण्यात आले आहे.

याबाबत सविस्तर माहिती अशी की, सिन्नर शिर्डी महामार्गावर वावीजवळ पिकअप गाडीचा भीषण अपघात झाल्याची घटना घडली. भरधाव पिकअप उलटून झालेल्या या अपघातात २ महिला मजुरांचा मृत्यू झाला तर २० जण जखमी झाले आहेत. चालकाचे गाडीवरील नियंत्रण सुटल्याने ही अपघाताची घटना घडली.

समोर आलेल्या माहितीनुसार, सिन्नर- शिर्डी महामार्गाची सफाई, गवत काढणे या कामाचं कंत्राट घेतलेल्या कंपनीसाठी या महिला मजूर काम करत होत्या. संध्याकाळी ठेकेदाराच्या गाडीतून त्या कामावरुन परतत होत्या. वावी गावाजवळ चालकाचं गाडीवरील नियंत्रण सुटल्याने भरघाव गाडी उलटली.

या दुर्घटनेत २ महिला मजूरांचा मृत्यू झाला तर २० जण जखमी झाले. हा अपघात इतका भीषण होता की गाडीवरील मजूर दूरवर फेकले गेले. अपघाताची माहिती मिळताच स्थानिक, पोलीस, रुग्णवाहिका घटनास्थळी दाखल झाल्या. अपघातातील जखमींवर रुग्णालयात उपचार सुरू आहेत.