अजय सोनवणे| नाशिक, ता. ११ जुलै २०२४

नाशिकमधून एक मोठ्या अपघाताची बातमी समोर आली आहे. नाशिकच्या मालेगाव जवळील वाके शिवारात उभ्या असलेल्या कंटनेरला भरधाव कार धडकल्याने दोन मुलींसह जावई ठार झाल्याची दुर्देवी घटना घडली आहे. वडिलांच्या अंत्यविधीला जाताना काळाने घाला घातल्याने सर्वत्र हळहळ व्यक्त होत आहे.

गेल्या काही दिवसांपासून राज्यात अपघातांचे सत्र सुरू आहे. मुंबई वरळीमधील हिट अँड रन प्रकरण, नाशिकमध्ये मुलीला चिरडल्याची घटना ताजी असतानाच आणखी एक भीषण अपघाताची घटना समोर आली आहे. नाशिकच्या मालेगाव जवळील वाके शिवारात रात्रीच्या सुमारास भरधाव कारने कंटेनरला धडक दिल्याने भीषण अपघात झाला. यामध्ये तिघांचा जागीच मृत्यू झाला.

समोर आलेल्या माहितीनुसार, कारमधील कुटुंब हे वडिलांच्या अंत्यविधीसाठी निघाले होते. नाशिकच्या मालेगावजवळील वाके शिवारात मुंबई-आग्रा महामार्गावर रस्त्यावर उभ्या असलेल्या कंटनेरवर त्यांची भरधाव पंच कार आदळली.

यामध्ये दोन मुलींसह जावई जागीच ठार झाले. मिनाक्षी अरुण हिरे,सुनंदा विकास सावंत व विकास चिंतामण सावंत असे तिघांची नाव असून यात नात वैभवी प्रविण जाधव ही जखमी झाली आहे. या दुर्दैवी घटनेने सर्वत्र हळहळ व्यक्त होत आहे.