संजय गडदे, मुंबई प्रतिनिधी

Narhari Zirwal video case : विधानसभेचे उपाध्यक्ष, मंत्री नरहरी झिरवाळ यांच्या कथित व्हिडिओ प्रकरणाला आता नवे वळण मिळाले आहे. या व्हिडिओमध्ये दिसणाऱ्या तृतीयपंथीय व्यक्तीने स्वतःच्या भावाविरुद्धच मुंबईतील कफ परेड पोलीस ठाण्यात तक्रार दाखल केली आहे. भावाविरोधात त्यांनी 'ब्लॅकमेल'चा आरोप केला आहे.

भावाने तिला ब्लॅकमेल केले आणि मूळ व्हिडिओ जाणीवपूर्वक 'एडिट' करून सोशल मीडियावर व्हायरल केल्याचा आरोप तक्रारदार व्यक्तीने पोलिसांत केला आहे. पोलिसांनी याप्रकरणी BNS कलम ७९, ३५१(१) आणि IT Act नुसार गुन्हा दाखल केला आहे. यामध्ये गोपनीयतेचा भंग आणि बदनामी केल्याचे आरोप ठेवण्यात आले आहेत.

नरहरी झिरवाळ यांनी हा व्हिडिओ बनावट असून अनेक क्लिप्स जोडून तो तयार करण्यात आल्याचा दावा केला आहे. मुख्यमंत्री देवेंद्र फडणवीस यांच्या सल्ल्यानुसार त्यांनी कायदेशीर पावले उचलली आहेत. सध्या पोलीस या प्रकरणाचा तांत्रिक तपास करत असून, व्हिडिओचे मूळ स्त्रोत शोधण्याचे काम सुरू आहे. या नव्या वळणामुळे झिरवाळ यांना मोठा दिलासा मिळण्याची शक्यता वर्तवण्यात येत आहे.