सागर निकवाडे 
नंदुरबार : अक्कलकुवा तालुक्यातील सल्लीबार येथे ग्रामपंचायत सरपंचविरोधात दाखल केलेल्या अविश्वास ठरावावरून मोठा राडा झाल्याची घटना घडली आहे. यात अविश्वास ठरावावरील मतदान प्रक्रियेसाठी जात असलेल्या ग्रामपंचायत सदस्यांवर जमावाने जीवघेणा हल्ला करत दगडफेक, मारहाण करण्यात आल्याचा प्रकार घडला आहे. गाडीच्या काचा देखील जमावाने फोडल्या आहेत.

नंदुरबार जिल्ह्यातील अक्कलकुवा तालुक्यामधील सल्लीबार ग्रामपंचायतमध्ये हा धक्कादायक प्रकार घडला आहे. गावच्या सरपंचावर काही ग्रामपंचायत सदस्यांनी नाराजी व्यक्त केली होती. कामकाजावर नाराजी असल्याने सरपंचावर अविश्वास ठराव करण्यात आला होते. हा ठराव पारित करण्यासाठी आज ग्रामपंचायतमध्ये सभेचे आयोजन करत मतदानाची प्रक्रिया घेण्यात येणार होती. हि मतदान प्रक्रिया पार पाडण्याअगोदरच जोरदार राडा झाला आहे. 

सदस्यांच्या गाडीवर दगडफेक 

दरम्यान ग्रामपंचायतीचे सदस्य सरपंचावरील अविश्वास ठराव पारित करण्यासाठी बोलावलेल्या विशेष सभेसाठी गाडीने जात होते. सदस्यांच्या या गाडीवर जमावाने अचानक दगडफेक करत हल्ला केला. यात गाडीच्या काचा देखील फोडण्यात आल्या आहेत. शिवाय काहींनी बांबूने मारहाण केल्याचा प्रकार घडला असून सदस्यांनी देखील प्रतिकार केल्याने गावात जोरदार राडा झाल्याचे पाहण्यास मिळाला. 

१७ जणांवर गुन्हा दाखल 

दरम्यान हल्ला केल्याच्या घटनेबाबत ग्रामपंचायत सदस्यांनी पोलिसात धाव घेतली. यावेळी गाडीवर दगडफेक, मारहाण तसेच विनयभंग केल्याप्रकरणी मोलगी पोलीस ठाण्यात १७ जणांविरोधात गुन्हा दाखल करण्यात आला आहे. या प्रकरणी पोलीस तपास करत असून घटनेनंतर गावात तणावपूर्ण शांतता आहे.