सागर निकवाडे

नंदूरबार : रजा रोखीकरणाचे बिल काढण्यासाठी लाच मागितल्‍याचा प्रकार नंदुरबार जिल्ह्यातील नवापूर (Navapur) शहरातील सार्वजनिक गुजराती हायस्कूलमध्‍ये समोर आला. या प्रकरणात वरिष्ठ लिपिक विनोद साकरलाल पंचोली (वय ५०) लाचलुचपत विभागाच्‍या (ACB) जाळ्यात अडकला. (Maharashtra News)

नवापूरमधील सार्वजनिक गुजराती हायस्‍कूलमधील वरिष्‍ठ लिपिक पंचोली याने तक्रारदार यांच्याकडून रजा रोखीकरणाचे बिल काढून देण्याचा मोबदल्यात ४५ हजारांची लाच घेताना नंदुरबार लाच लुचपत विभागाने रंगेहात पकडले. यासंदर्भात नवापूर पोलीस ठाण्यात गुन्हा दाखल करण्याची प्रकिया सुरू आहे. स्वेच्छानिवृत्ती घेतल्यानंतर त्यांच्या रजा रोखिकरणाची रक्कम लाचखोर विनोद पंचोली याने दिलेल्या धनादेशाद्वारे तक्रारदार यांच्या बँक खात्यात जमा झाली होती.

तक्रारदार यांची रजा रोखीकरणाची रक्कम काढून दिल्याबद्दलच्या मोबदल्यात लाचखोर विनोद पंचोली याने तक्रारदार यांच्याकडून ४५ हजार रुपये लाचेची (Bribe) मागणी करून २१ जूनला नवापुर शहरातील रहात्या घरी गुजर गल्लीत लाचेची रक्कम स्वीकारली आहे. त्याला लाच लुचपत प्रतिबंधक विभागाने अटक केली असून नवापुर पोलीस ठाणे येथे गुन्हा दाखल करण्याची प्रक्रिया सुरू आहे. लाचखोर वरिष्ठ लिपिक विनोदी पंचोली याने लाच घेतल्याप्रकरणी शैक्षणिक क्षेत्रात मोठी खडबळ उडाली आहे.