नवापूर (नंदुरबार) : शहरातील दूरध्वनी कार्यालयासमोर राष्ट्रीय महामार्गाचे चौपदरीकरणाचे काम सुरू आहे. या ठिकाणी सिमेंट घेऊन येणारा टँकर चालकाचा हाय व्होल्टेज असलेल्या ३३ के व्ही विद्युत तारेला शॉक लागून जागीच मृत्यू झाला. सदर चालक हा सोनगीर (ता. धुळे) येथील रहिवासी आहे. (nandurbar-news-navapur-fourway-work-Tanker-driver-dies-after-high-voltage-wire-current)

नवापूर पोलिसांकडून मिळालेल्या माहितीनुसार नरडाणा येथून सिमेंट कंपनीच्या प्लांटमधून ट्रान्सपोर्टच्या माध्यमातून सुटे सिमेंट वाहन चालक भगवान बडगुजर टँकर (क्र. एमएच ०४, एफपी ६१०४) घेऊन आला. दुपारच्या सुमारास राष्ट्रीय महामार्गावर चौपदरीकरणाचे कन्ट्रक्शन करणारी कंपनीचे सुटे सिमेंट खाली केले.

झाकण उघडे राहिल्‍याने झाला घात

टँकरवरील झाकण उघडे राहून गेल्याने झाकण बंद करण्यासाठी चालक वाहनावर चढला असता वरील हायव्होल्टेज असलेल्या ३३ केव्ही विद्युत तारेला चालकाचा स्पर्श झाला. यात चालक भगवान बडगुजर (वय ४५, रा. सोनगीर धुळे) यांना जोरदार झटका बसला असता ते टँकरवरून खाली फेकले गेले. यात त्‍यांचा जागीच मृत्यू झाला. नवापूर येथील पोलीस उपनिरीक्षक अशोक मोकळं, युवराज परदेशी, योगेश तनपुरे यांनी १०८ रुग्णवाहिका बोलावून उपजिल्हा रूग्णालयात दाखल केले असता डॉक्टरांनी त्‍यास मृत घोषित केले. घटनेचा तपास पोलीस उपनिरीक्षक अशोक मोकळं करत आहेत.