सागर निकवाडे 

नंदुरबार : बँक शाखेतील एका खात्यातून तीन लाख १० हजारांची रक्कम विविध बँकेच्या खात्यात वर्ग करीत शाखा व्यवस्थापकाने फसवणूक केल्याची घटना धडगाव शहरात घडली आहे. याप्रकरणी सेंट्रल बँक ऑफ इंडिया शाखा राजबर्डीच्या निलंबित व्यवस्थापका विरोधात धडगाव पोलीस ठाण्यात गुन्हा दाखल करण्यात आलेला आहे.

वर्धा जिल्ह्यातील गिरड येथील प्रवीण लक्ष्मण गेडाम याची धडगाव तालुक्यातील राजबर्डी येथील सेंट्रल बँक ऑफ इंडिया या शाखेच्या शाखा व्यवस्थापक म्हणून नियुक्ती करण्यात आलेली होती. परंतु शाखा व्यवस्थापक पदाचा गैरवापर करून प्रवीण गेडाम याने १९ जुलै २०१९ ते १५ एप्रिल २०२३ दरम्यान शाखा व्यवस्थापक प्रवीण गेडाम याने बँकेच्या खात्यातील रक्कमेत अपहार करत रक्कम स्वतःच्या फायद्यासाठी वापरली. 

विविध बँकेच्या खात्यात वर्ग केली रक्कम 

प्रवीण गेडाम याने बँक खात्यातील स्टाप तीन क्लब राजबर्डी यांच्या नावे असलेल्या खात्यातून तीन लाख दहा हजार रुपयांची रक्कम स्वतःच्या फायद्यासाठी विविध बँकेच्या खात्यात वर्ग केली. तसेच बँकेची फसवणूक करून रक्कम काढून घेत अपहार केला. सदर अपहार झाल्याचा प्रकार नवीन आलेल्या शाखा व्यवस्थापकाच्या लक्षात आला. यानंतर याची चौकशी केली असता गेडाम याने हा अपहार केल्याचे लक्षात आले. 

गेडाम विरोधात पोलिसात गुन्हा दाखल 

दरम्यान या प्रकरणी सेंट्रल बँक ऑफ इंडिया शाखा राजबर्डीच्या मॅनेजर चंद्रशेखर सुरेश महाजन यांनी धडगाव पोलीस ठाण्यात फिर्याद दिली आहे. त्यानुसार निलंबित व्यवस्थापक प्रवीण लक्ष्मण गेडाम यांच्याविरुद्ध कलम 49 प्रमाणे गुन्हा दाखल करण्यात आला आहे. या प्रकरणी पोलिसांकडून तपास सुरु आहे.