नंदुरबार : विष्णू भगवानची लाकडी मुर्ती देतो, असे नाव करून एकाकडून वेळोवेळी एक लाख ७२ हजार रुपये उकळून फसवणूक केली. तसेच संबधितास प्रकाशा येथील तापी पुलाखाली नेऊन मारहाण करण्याचा प्रकार घडला. याबाबत नंदुरबार (Nandurbar) शहर पोलिस ठाण्यात दोघांविरुद्ध गुन्हा दाखल करण्यात आला आहे. ही घटना जानेवारी ते ६ मे २०२२ दरम्यान घडली. (nandurar crime news wooden idol of God fraud two lakh rupees)

विशाखापट्टन (तमिळनाडू) येथील कापड दुकानावर खासगी नोकरी करणारा जिंगाली रवींद्र यादव रेल्वेने प्रवास करत असताना अकोला (Akola) स्टेशन पास केल्यानंतर करण पवार नामक व्यक्ती भेटला. त्याने यादव यांना ५० हजार रुपये किमतीची विष्णू भगवानची लाकडी मुर्ती २५ हजार रुपयात देतो, असे आमिष (Money Fraud) दाखविले. त्यामुळे फोन पेद्वारे यादव याने त्यास रक्कम पाठविली. त्यानंतर हॉटेल गौरव प्लाझा येथे दोन वेळेस हजार-हजार रुपये दिले. त्यानंतर करण पवार याचा मित्र मोबाईल (८०१०८३३१७४) धारक मनोज पवार याने तीच मुर्ती पाहिजे असल्यास दीड लाख रुपये लागतील असे सांगितले. त्यानंतर यादव याने नेहरू चौकातून एचडीएफसी बॅंकेतील एटीएमद्वारे दीड लाख रुपये काढून जमविले.

साथीदारांच्‍या मदतीन मारहाण

त्यानंतर ६ मेस मनोज पवार याने मोटारसायकलीवर बसवून प्रकाशा येथे तापी नदीच्या पुलाखाली नेले. तेथे त्यांचा दोन साथीदारांपैकी एकाने सुरा दाखवून पोटात बुक्का मारून मारहाण केली. तसेच दीड लाखाची रक्कम व दहा हजाराचा मोबाईल हिसकावून घेतला. अशी फिर्याद जिंगाली रवींद्र यादव यांनी दिली आहे. त्यानुसार करण पवार व मनोज पवार या व्यक्तींविरुद्ध नंदुरबार शहर पोलिसात (Police) विश्‍वास संपादन करून फसवणुकीचा गुन्हा दाखल केला आहे. पोलिस निरीक्षक किरणकुमार खेडकर पुढील तपास करीत आहेत.