नांदुरा (बुलढाणा) : मंतिमंद असलेला व मागील तीन दिवसांपासून परभणी जिल्ह्यातील पुर्ना गावातून हरवलेल्या दहा वर्षाच्या बालकाची व त्याच्या आई-वडीलांची भेट घालुन दिल्याचा सुखद प्रकार बुलढाणा (Buldhana) जिल्ह्यात आज घडला. नांदुरा (Nandura) येथील रेल्वे सुरक्षा बलाचे शिवाजी ढगे आणि वर्धा पुलगाव येथील रंजन तेलंग या कर्मचाऱ्यांनी प्रसंगावधान राखून बालकाला आईकडे सुपुर्द केला. (nandura news Missing child from Parbhani district in Nandura)

परभणी (Parbhani) जिल्ह्यातील पूर्णा येथील एक दहा वर्षाचा गोलु नामक मुलगा जन्माने मतिमंद पण पूर्णा गावातील सर्वांचाच तो अतिशय लाडका. गोलू हा तीन दिवसांपूर्वी अचानक गायब झाला होता. याबाबत नातेवाईकांनी पोलिसात तक्रार नोंदवली. तर गावातील प्रत्येक नागरिकाने गोलूचा शोध घेण्यासाठी सोशल मीडियावर (Social Media) मोहीम राबवत त्याचा फोटो व्हायरल केला.

असा लागला शोध

दरम्यान शनिवारी (२२ जानेवारी) रात्री एक १० वर्षाचा मुलगा रेल्वे स्टेशनवर थंडीत कुडकुडत असतांना कर्तव्यावर असलेल्या आरपीएफचे प्रधान आरक्षक शिवाजी ढगे यांना दिसला. त्‍यांनी सदर बालकाची आस्थेने विचारपूस करीत त्याला थंडीपासून बचावासाठी अंथरून आणून दिले. मतिमंद असल्याने त्याच्याकडून मिळेल; ती माहिती घेऊन वर्धा जिल्ह्यातील पुलगाव येथील विशेष आरपीएफमध्ये खुफिया शाखेचे माजी प्रधान आरक्षक रंजन तेलंग यांची मदत घेत परभणी जिल्ह्यातील रेलवे सुरक्षा बलाला कळविण्यात आले. गोलूच्‍या पालकांचा शोध लावण्यात आला. दरम्यान आज त्याचे आई राणी भीमराव सोनकांबळे ह्या नांदुरा रेल्वे स्थानकावर पोहचल्या. यावेळी रेलवे सुरक्षा बलाने हरविलेल्या गोलूला आईच्या सुपूर्द केले.