संजय सूर्यवंशी 
नांदेड : दरवर्षी गणेश विसर्जनावेळी नदीत बुडून मृत्यू झाल्याच्या घटना घडत असतात. त्यानुसार यंदाच्या विसर्जनावेळी देखील राज्यात अनेक ठिकाणी नदीत बुडाल्याच्या घटना घडल्या आहेत. नांदेड शहरातील गणेश विसर्जनासाठी तिघेजण नदीत उतरले होते. यावेळी पाय घसरल्याने ते तिघेही नदीत वाहून गेले होते. दरम्यान यातील एकाला वाचविण्यात यश मिळाले आहे. 

गणपती बाप्पा मोरया, पुढच्या वर्षी लवकर या..असे म्हणत लाडक्या गणरायाचे विसर्जन करण्यात आले. दहा दिवसांच्या उत्सवाची सांगता अनंत चतुर्दशीला गणरायाला निरोप देऊन करण्यात आला. दरम्यान काही ठिकाणी गणपती विसर्जित करताना दुर्दैवी घटना घडल्या असून नांदेड जिल्ह्यात देखील अशीच घटना समोर आली असून यात नदीत वाहून गेलेले दोघेजण बेपत्ता आहेत. 

दोघेजण बुडाले, एकाला वाचविण्यात यश 

नांदेड शहरात गणेश विसर्जन सुरळीत सुरु असताना शहरालगत असलेल्या गाडेगाव परिसरात एक दुर्देवी घटना घडली. गावातील गणरायाच्या मूर्तीचे विसर्जन करण्यासाठी तिघेजण पाण्यात उतरले होते. यात तिघांचा पाय घसरल्याने ते पाण्यात बुडाले. यातील दोन तरुण नदीत बुडाले. तर अन्य एकाला वाचवण्यात ग्रामस्थांना यश आलं आहे. शनिवारी सायंकाळी साडे सहा वाजण्याच्या सुमारास गाडेगाव आसना नदी येथे ही दुर्देवी घटना घडली. 

दोघांचा शोध सुरूच 

तर घटनेला अनेक तास उलटून देखील एसडीआरएफ पथकाकडून बुडालेल्या दोघांचा शोध सुरूच आहे. बालाजी कैलास उबाळे (वय १८) आणि योगेश गोविंद उबाळे (वय १७) अशी वाहून गेलेल्या तरुणांची नावं असून दोघे गाडेगाव येथील रहिवासी आहेत. या घटनेने दोन्ही कुटुंबियांवर दुःखाचा डोंगर कोसळला असून गावात शोककळा पसरली आहे.