संजय सूर्यवंशी
नांदेड : विधानसभा निवडणुकीचा कार्यक्रम जाहीर करण्यासोबत निवडणूक आयोगाने नियमावली जाहीर केली आहे. यात उमेदवाराला प्रचार करण्यासाठी काही नियम आखून देण्यात आले आहेत. दरम्यान प्रचार करताना विना परवाना बल्क मॅसेज प्रसारित केल्याप्रकरणी नांदेडच्या उत्तर मतदारसंघातील तीन उमेदवारांना नोटीस बजावण्यात आली आहे. 

विधानसभा निवडणुकीत प्रचाराच्या तोफा आता धडाडू लागल्या आहेत. निवडणुकीच्या रिंगणात असलेले उमेदवार आता मतदारांपर्यंत पोहचण्यावर अधिक भर देत आहेत. यासाठी प्रत्यक्ष गाठी भेटी घेणे. तसेच सोशल मीडियाचा वापर करून प्रचार करत आहेत. मात्र हा प्रचार करताना उमेदवारासाठी निवडणूक आयोगाने काही नियमावली ठरवून दिली आहे. शिवाय निवडणूक आयोगाचे यावर लक्ष देखील असते. याचमुळे नांदेड उत्तर मतदारसंघातील उमेदवारांना नोटीस बजावण्यात आली आहे. 

नांदेड उत्तर मतदारसंघातील उमेदवारांना निवडणूक आयोगाने नोटीस बजावली आहे. निवडणूक आयोगाची पूर्व परवानगी घेतल्याशिवाय बल्क मॅसेज प्रसारित केल्याने ही नोटीस बनवण्यात आली आहे. त्यामध्ये नांदेड उत्तर मतदारसंघातील ठाकरे शिवसेनेच्या उमेदवार संगीता पाटील डक, शिंदे गटाचे उमेदवार आमदार बालाजी कल्याणकर आणि अपक्ष उमेदवार मिलिंद देशमुख यांचा समावेश आहे.