Nanded News:

काही तरुण आपण सगळ्यात हटके आणि रुबाबदार दिसावं म्हणून वेगवेगळी फॅशन करतात. त्यात भाईगीरी करणारे तरुण हमखास आपल्या शर्टची काही बटणे खुली ठेवतात. आता अशीच शायनींग मारत भाईगिरी करणे चार तरुणांना महागात पडलं आहे. पोलिसांनी त्यांना चांगलीच अद्दल घडवलीये. (Latest Marathi News)

चार तरुण आपल्या शर्टची काही बटणे उघडी ठेवून पोलीस ठाण्यात आले होते. या चौघांना पोलीस निरीक्षकाने चांगलीच अद्दल घडवली. बटण उघडे ठेवणाऱ्या चार जणांविरोधात गुन्हा दाखल करून त्यांना पोलीस स्टेशनची हवा दाखवली आहे.

लोहा पोलीस स्टेशनमध्ये अशा पध्दतीने जाणं चौघांना चांगलंच अंगलट आलंय. वेगवेगळ्या कारणांसाठी चौघेजण नांदेडच्या लोहा पोलीस ठाण्यात आले होते. पण पोलीस ठाण्यात आले त्यावेळी या चौघांच्या शर्टचे वरचे बटण उघडे होते. पोलीस निरीक्षक ओमकांत चिंचोलकर यांनी ते पाहिले आणि चौघांना चांगली अद्दल घडवली.

या चौघांविरुदध सार्वजनिक ठिकाणी असभ्य वर्तन केल्याप्रकरणी कलम 110, 112 आणि 117 अन्वये गुन्हा दाखल करण्यात आला. पोलीस ठाणे हे शिस्तीचे आणि सार्वजनिक ठिकाण आहे. या ठिकाणी असभ्य वागणे योग्य नसल्याने गुन्हा दाखल केल्याची प्रतिक्रीया पोलीस निरीक्षक ओमकांत चिंचोलकर यांनी दिली.

पोलीस ठाण्यात शर्टचे बटण उघडे ठेवल्याने तरुणांवर गुन्हा दाखल झाला आहे. नांदेडमधील या घटनेची संपूर्ण गावभर चर्चा सुरू आहे. फक्त शर्टच्या बटणावरून गुन्हा दाखल झाल्याने गावातील इतर भाईगीरी करणारे तरुण देखील नमले आहेत.