संजय सूर्यवंशी 

नांदेड : नांदेड शहरात आज दुपारच्या सुमारास झालेल्या भीषण अपघातात हिट अँड रणचा थरार घडला आहे. यात एका मद्यधुंद अवस्थेत कार चालवत भरधाव वेगाने येत रस्त्याच्या कडेला उभ्या असलेल्या वाहनांना जोरदार धडक देत उडविले. यामध्ये एक दुचाकीस्वार व रिक्षा चालक गंभीर जखमी झाले आहेत. जखमींना रुग्णालयात उपचारासाठी दाखल करण्यात आले आहे. तर इतर वाहनांचे मोठे नुकसान झाले आहे. 

नांदेड शहरातील भाग्यनगर कॉर्नर जवळ हा भीषण अपघात दुपारच्या सुमारास झाला आहे. यामध्ये भरधाव वेगाने आलेल्या कारने रस्त्याच्या कडेला उभ्या असलेल्या दोन ऑटो रिक्षा, एक मारुती कार, बुलेट आणि इतर काही दुचाकींना जबर धडक देत उडविले. यावेळी आजूबाजूच्या परिसरात असलेल्या नागरिकांच्या अंगाचा थरकाप उडाला होता. सुदैवाने यात जीवितहानी झाली नसली, तरी दोघेजण गंभीर जखमी आहेत. 

कार चालकाचे नियंत्रण सुटले 

कार दिलेल्या धडकेत बुलेट चालक व एका ऑटो रिक्षा चालकाची अवस्था गंभीर आहे. जखमीना तात्काळ रुग्णालयात दाखल करण्यात आले आहे. या अपघातामुळे परिसरात एकच खळबळ उडाली. तर प्रत्यक्षदर्शींनी दिलेल्या माहितीनुसार सदर कार चालक मद्यधुंद अवस्थेत होता. त्याचे वाहनावर नियंत्रण नसल्यामुळे उभ्या वाहनांना धडक दिली गेली. यात अनेकजण थोडक्यात बचावले आहेत. 

कार चालकाला पोलिसांनी घेतले ताब्यात 

अंगाचा थरकाप उडविणाऱ्या या अपघातानंतर परिसरात एकच गोंधळ उडाला होता. तर घटनेची माहिती मिळताच भाग्यनगर पोलिसांनी तत्काळ घटनास्थळी येत घटनेची माहिती घेतली. तर कार चालकाला ताब्यात घेतलं असून, या प्रकरणाचा पुढील तपास सुरू आहे. दरम्यान सदर अपघातात वाहनांचे मोठ्या प्रमाणात नुकसान झाले आहे.