पराग ढोबळे, साम टीव्ही

नागपूर शहर दोन हत्येच्या घटनेने हादरलंय. नागपुरात उधारीच्या पैशाच्या वादातून शहरात दोन ठिकाणी हत्येचा थरार घडला. पहिली घटना अजनी पोलीस स्टेशनच्या हद्दीत घडलीय. यात ११०० रुपयांसाठी युवकाची हत्या करण्यात आली.बेसा–मानेवाडा रोडवरील पानठेल्यासमोर घटना घडली. ही घटना गुरुवारी रात्री घडली असून सीसीटीव्ही कैद झाली. तर दुसरी घटना गिट्टीखदान परिसरात घडली.

मिळालेल्या माहितीनुसार, अजनी परिसरात एक महाप्रसादाचा कार्यक्रम आयोजित करण्यात आला होता. महाप्रसादाच्या कार्यक्रमानंतर योगेश आणि उधारी देणाऱ्या अल्पवयीन तरुणामध्ये वाद उफाळला. अल्पवयीन तरुणाने उधारीचे पैसे मागत योगेश धक्काबुक्की केली. यावरून तणाव वाढला. त्यानंतर अल्पवयीन आरोपीने चाकूने सपासप वार केले.

आरोपीने योगेशच्या छाती, कंबर आणि मानेवर वार केले. यात योगेश गंभीर जखमी झाला. जखमी योगेशला तातडीने मेडिकल हॉस्पिटलमध्ये दाखल केले. परंतु योगेशचा उपचारादरम्यान मृत्यू झाला. या प्रकरणी अजनी पोलिसांनी अल्पवयीन आरोपीला ताब्यात घेऊन हत्येचा गुन्हा दाखल केला आहे.

दुसरी घटना गिट्टीखदान परिसरात १० हजारांच्या वादातून घडली. हर्षु उर्फ गुड्डू पांडे याच्यावर जोरदार हल्ला करण्यात आला. आरोपीने पांडेच्या डोक्यात वार केले. जीवघेण्या हल्ल्यात जखमी झालेल्या पांडेला मेयो रुग्णालयात नेले. मात्र, डॉक्टरांनी मृत घोषित केले. या घटनेनंतर फॉरेन्सिक पथकासह पोलीस दाखल झाले.

या प्रकरणानंतर मुख्य आरोपीसह साथीदार फरार गिट्टीखदान पोलिसांकडून शोधमोहीम सुरू आहे. पैशाच्या वादातून गुन्हेगारी वाढते असल्याने शहरातील कायदा-सुव्यवस्थेवर प्रश्नचिन्ह निर्माण होत आहे. हत्येच्या घटनेमुळे रात्रीच्या वेळी शहरात भीतीचे वातावरण पसरलं आहे. या प्रकरणानंतर पोलिसांनी सतर्कतेचे आवाहन केलं आहे.