नागपूर : पावसाळ्याच्‍या दिवसात साप, विंचू निघत असतात. ते कुठेही कानाकोपऱ्यात जावून बसतात. असाच प्रकार (Nagpur) नागपूरात समोर आला आहे. महिलेच्या स्कूटरच्या हेडलाईटमधून साप निघाल्याची थरारक घटना घडली आहे. स्कूटरच्या हेडलाईट मधून (Snake) साप काढत असल्याचा व्हिडिओ सध्या सोशल मीडियावर प्रचंड व्‍हायरल झाला आहे. (Live Marathi News)

नागपूरातील सीमा ढूलसे नावाची महिला बँक योजनेच्या कलेक्शनचे काम करतात. मंगळवारी (११ जुलै) त्या नागपूरच्या वाठोडा परिसरातील एका इमारतीमध्ये कलेक्शनसाठी गेल्या होत्या. इमारतीच्या पार्किंगमध्ये त्यांनी त्यांची स्कूटर पार्क केली होती. काम आटोपून परत आल्यावर स्कूटर काढताना हेडलाईट मधल्या गॅपमध्ये त्यांना सापाची शेपटी दिसली. त्यांनी लगेच स्कूटर थांबवून सर्पमित्रांना फोन केला.

बिनविषारी होता साप

सर्पमित्रांनी घटनास्थळी येऊन हेडलाईटमधून साप बाहेर काढला. हा साप बिनविषारी असल्याची माहिती सर्पमित्रांनी दिली. मात्र गाडी काढतानाच साप असल्याचे लक्षात आल्याने बरे झाले; अन्‍यथा चालत्या गाडीत जर साप बाहेर आला असता तर अपघात होण्याची शक्यता होती.