पराग ढोबळे, साम टीव्ही नागपूर

पतीच्या मृत्यूनंतर संपत्ती आणि प्रेमसंबंधात अडसर ठरणाऱ्या सासूची चक्क सुनेने सुपारी देऊन हत्या केल्याची धक्कादायक घटना नागपूर शहरात घडली. याप्रकरणी अजनी पोलिसांनी तपासाची चक्रे फिरवत महिलेसह तिच्या दोन चुलत भावांना अटक केली. सुनीता राऊत (वय 54) असे मृत महिलेचे नाव आहे. तर वैशाली राऊत (वय 32) असं आरोपी सुनेचे नाव आहे. तिच्यावर विविध कलमाअंतर्गत गुन्हा दाखल करण्यात आला आहे.

पोलिसांनी (Police) दिलेल्या माहितीनुसार, पती आणि मुलाच्या मृत्यूनंतर मृत सुनीता राऊत या सून वैशाली आणि 5 वर्षाच्या नातीसोबत नागपूर शहरातील अजनी पोलीस ठाण्याच्या हद्दीत राहत होत्या. 28 ऑगस्ट रोजी सुनीता यांचा हृदयविकाराच्या झटक्याने मृत्यू झाला, असा बनाव आरोपी वैशालीने रचला.

त्याच दिवशी तडकाफडकी तिने सासूवर अंत्यसंस्कार देखील केले. मात्र, सासू आणि सुनेत वाद झाला आणि या वादातूनच (Crime) काहीतरी विपरीत घडले, अशी कुजबूज शेजाऱ्यांमध्ये सुरू होती. काहींनी या घटनेची माहिती पोलिसांना दिली. पोलिसांनी तातडीने तपासाची चक्रे फिरवत संपूर्ण हत्याकांडाचा छडा लावला.

दरम्यान, आमच्या घरी रात्री दोन मामा आले होते. त्यांनी माझ्या आजीचा गळा दाबला, अशी माहिती आरोपी वैशाली हिच्या 5 वर्षीय मुलीने पोलिसांना दिली. यानंतर पोलिसांनी आरोपींना ताब्यात घेऊन त्यांची कसून चौकशी केली असता, आपणच सुनीता यांची हत्या केली अशी कबुली त्यांनी दिली. मृत सुनिता या वैशालीच्या चरित्रावर संशय घेत होता.

तसेच सासूचा काटा काढला तर पूर्ण संपत्ती आपली होईल, या विचारातून वैशालीने हत्या केली. याप्रकरणी पोलिसांनी आरोपी वैशाली तसेच तिचा भाऊ श्रीकांत हिवसे आणि प्रकाश हिवसे यांच्या विरोधात गुन्हा दाखल अटक केली आहे. वैशालीचे दोन्ही चुलत भाऊ मध्यप्रदेशातील पांढुरणा जवळील पांढरा गोडी येथील राहणारे आहेत.