पराग ढोबळे, साम टीव्ही

नागपुरातील एमआयडीसीमध्ये शुक्रवारी दुपारी मोठी दुर्घटना घडली. निर्माणाधान टाकी कोसळल्याने अनेक जण ढिगाऱ्यााली दबले गेले. या दुर्घटनेतील मृतांचा आकडा वाढला आहे. आतापर्यंत ६ कामगारांचा मृत्यू झाला. यात काही कामगार देखील जखमी झाले आहेत.

मिळालेल्या माहितीनुसार, नागपुरातील बुटीबोरी पोलीस स्टेशनच्या हद्दीत येणाऱ्या आवाडा कंपनीच्या निर्माणाधीन पाण्याच्या टाकीचा सकाळी ११ वाजता स्फोट झाल्याची घटना घडली. यात आतापर्यंत सहा जण दगावले. तर काही जण जखमी झाले.

टाकीचा स्फोट झाल्यानंतर तातडीने काही जण मदतीला धावले. त्यांनी ढिगाऱ्याखाली दबलेल्या कामगारांना बाहेर काढले. त्यांनी ८ कामगारांना ढिगाऱ्याखालून बाहेर काढले. या जखमींना तातडीने रुग्णालयात दाखल केले. या घटनेची माहिती पोलीसही घटनास्थळी मदतकार्यासाठी पोहोचले.

नागपूर ते चंद्रपूर महामार्गावरील ही आवाडा सोलर पॅनल तयारी करणारी कंपनी आहे. याच कंपनीमध्ये एक टाकी तयार करण्यात येत होती. या टाकीचे काम अंतिम टप्प्यात आले असताना ही दुर्घटना घडली. या दुर्घटनेचा व्हिडिओ आणि फोटो क्षणार्धात सोशल मीडियावर व्हायरल झाले होते.

मृतकांची नावे

1. अरविंद कुमार ठाकुर ,वय. 28 वर्षे, रा. चंपारण ( बिहार )

2. अशोक कंचन पटेल, वय. 42 वर्षे, रा. पहाडपूर ( बिहार)

3. अजय राजेश्वर पासवान, वय. 26 वर्षे, रा. मूजफ्फरपूर (बिहार)

4. सुधांशु कुमार नागेश्वर साहणी, वय. 36 वर्षे, रा. मूजफ्फरपूर (बिहार),

5. बुलेट कुमार इंद्रजित षहा, वय. 30 वर्षे रा. मिश्रौली, सुहानी, पश्चिम चंपारण (बिहार)

6. शमिम अन्सारी, वय. 42 वर्षे, रा. मूजफ्फरपूर (बिहार)