पराग ढोबळे, साम प्रतिनिधी

नागपूरच्या धरमपेठ परिसरात हिट अँड रनची धक्कादायक घटना घडलीय. हॉस्पिटलमधून उपचार घेऊन घरी परतणाऱ्या दम्पत्याला एका भरधाव कारनं उडवलं. या दुर्घटनेत एका ७४ वर्षी व्यक्तीचा मृत्यू झाला. हा अपघात नागपूर शहरातील धरमपेठ भागातील अलंकार टॉकीज परिसरात घडली. रामदास पाटील, असं अपघातात मृत्युमुखी पडलेल्या व्यक्तीचे नाव आहे.

रामदास पाटील हे आपल्या पत्नीसह व्होकार्ट हॉस्पिटलमध्ये उपचार घेऊन अजनी परिसरातील आपल्या घरी जात होते. नागपूर सुधार प्रन्यासच्या सभापतींच्या बंगल्यासमोर त्यांची दुचाकी आली असताना तेथे एका डस्टर कारनं त्यांच्या दुचाकीला जोरदार धडक दिली. कारची धडक होताच नंतर कारचालक अधिक वेगाने कार तेथून पळवत पसार झाला.

या दुर्घटनेत रामदास पाटील यांचा जागीच मृत्यू झाला. तर पत्नी जखमी झालीय. संध्याकाळच्यावेळी दुर्घटना घडल्यानं अलंकार टॉकीज परिसरात मोठी वाहतूक कोंडी झाली होती. पोलिसांनी घटनास्थळी पोहोचून वाहतूक सुरळीत करण्यास सुरुवात केली. दरम्यान पोलिसांकडून फरार कारचालकाचा शोध घेतला जातोय.

भरधाव कारने मुलाला चिरडलं; 9 वर्षाच्या चिमुरड्याचा जागीच मृत्यू

मुंबईतील वांद्र्यात एका भरधाव कारनं नऊ वर्षाच्या मुलाला चिरडल्याची घटना दोन -तीन दिवसापूर्वी घडली होती. मेहेबूब स्टुडिओच्या परिसरात हा अपघाताचा थरार घडला होता. एक महिला कार चालवत होती. कार चालवताना ही महिला मोबाईल फोनवर बोलत होती. त्याचवेळी रस्त्याच्या कडेला असलेल्या एक मुलाला कारनं उडवलं. तेथील स्थानिकांनी मुलाला रुग्णालयात दाखल केलं, परंतु डॉक्टरांनी त्याला मृत घोषित केले.

अनियंत्रित कार ट्रॅफिक पोलिसांच्या चौकीत घुसली

नवी मुंबईतील बेलापूर परिसरात एक अनियंत्रित कार रस्त्यावरील लोखंडी रेलिंग तोडून थेट ट्रॅफिक पोलिसांच्या चौकीच्या आवारात घुसल्याची घटना काही दिवसापूर्वी घडली होती. कारने चौकीजवळील एका खोलीच्या भिंतीला जोरदार धडक दिल्याने भिंत तुटली. या अपघातात कारचेही नुकसान झाले. माहितीनुसार, किया सोनेट कार क्रमांक एमएच ४६ बीव्ही २१५२ चा चालक कार भरधाव व निष्काळजीपणे चालवत होता. त्यामुळे कारवरील नियंत्रण सुटून हा अपघात झाला.