संदीप येवले, नागपूर

नागपूरमध्ये गणेशोत्सवावर विरजण पडलं आहे. गौरी विसर्जनासाठी आईसोबत तलावावर गेलेल्या दोन मुलांचा पाण्यात बुडून दुर्दैवी मृत्यू झाल्याची हृदयद्रावक घटना झिल्पा येथे घडली. सणाच्या आनंदाच्या वातावरणात घडलेल्या या दुर्घटनेमुळे संपूर्ण परिसरावर शोककळा पसरली असून, दोन्ही कुटुंबांवर दुःखाचा डोंगर कोसळला आहे.या दुर्घटनेत दक्ष धनराज लाड आणि आयुष हरिचंद कुंभारे यांचा मृत्यू झाला.

मिळालेल्या माहितीनुसार, गौरी विसर्जनाच्या निमित्ताने दोघेही आपल्या आईसोबत झिल्पा येथील तलावावर गेले होते. विसर्जनाची प्रक्रिया सुरू असताना दोघेही अचानक खोल पाण्यात गेले आणि पाण्यात बुडाले. घटना लक्षात येताच परिसरातील नागरिकांनी त्यांना वाचवण्याचा प्रयत्न केला. मात्र, या दुर्घटनेत दोन्ही मुलांचा दुर्दैवी मृत्यू झाला. सणाच्या निमित्ताने घराबाहेर पडलेल्या मुलांवर काळाने अचानक घाला घातल्याने कुटुंबीयांवर दुःखाचा मोठा आघात झाला आहे.

दक्ष आणि आयुष यांच्या आकस्मिक निधनाची बातमी परिसरात पसरताच नातेवाईक, ग्रामस्थ आणि परिचितांनी घटनास्थळी धाव घेतली. दोन्ही मुलांच्या मृत्यूमुळे कुटुंबीयांचा आक्रोश पाहून मन हेलावून गेले. गौरी विसर्जनाच्या आनंदावर या दुर्घटनेने दुःखाचे सावट पसरले असून, झिल्पा परिसरातील वातावरण सुन्न झाले आहे.

घटनेची माहिती मिळताच पोलीस पथक घटनास्थळी दाखल झाले. पोलिसांनी घटनेची नोंद घेत पुढील तपास सुरू केला आहे. पीआय रणजीत शिरसाट, हवालदार निलेश उईके, पोलीस शिपाई अमोल वाघ आणि एएसआय धनराज भुक्ते या प्रकरणाचा पुढील तपास करत आहेत. सणासुदीच्या काळात घडलेल्या या दुर्दैवी घटनेमुळे परिसरात हळहळ व्यक्त होत आहे.