पराग ढोबळे, साम टीव्ही

नागपूर: महाराष्ट्रातील बेरोजगार तरुणांना नोकरीचं आमिष दाखवून फसवणुकीचे प्रकार सुरू असतानाच, आता चक्क एका आमदारालाच गंडा घालण्याचा प्रयत्न झाल्याचा प्रकार समोर आला आहे. पूर्व नागपूरचे भाजप आमदार कृष्णा खोपडे यांना स्टेट बँक ऑफ इंडियामध्ये (SBI) नोकरी लावून देण्याचं आमिष दाखवणारा संशयास्पद फोन आला. विशेष म्हणजे, फोन करणाऱ्याला आमदार असल्याची माहिती असतानाही, त्याने एका तासात तीन उमेदवारांची नावं पाठवण्यास सांगितल्याचा आमदारांचा दावा आहे.

बँकेचा व्यवस्थापक असल्याची ओळख सांगत बँकेत तीन जागा रिक्त असल्याचं फोनवर सांगण्यात आलं. मात्र, फोन करणाऱ्याच्या नावातील विसंगतीमुळे आमदार खोपडे यांना संशय आला आणि त्यांनी थेट पोलिसांत तक्रार दाखल केली. आता आमदारालाच फसवण्याचा प्रयत्न करणाऱ्यांची हिंमत वाढली असेल, तर सर्वसामान्य बेरोजगार तरुणांचं काय? असा प्रश्न उपस्थित होत आहे. या फोनमागे नेमकं कोण आहे आणि बेरोजगार तरुणांना लक्ष्य करण्याचा हा प्रयत्न आहे का, याचा तपास पोलिसांकडून सुरू आहे.

या प्रकरणाचा तपास करून संबंधितांना शोधून काढण्याची मागणी आमदार कृष्णा खोपडे यांनी केली आहे. इतकंच नाही, तर निवृत्त नागरिकांच्या आयुष्यभराच्या कमाईवरही सायबर फसवणूक करणारे डल्ला मारत असल्याच्या घटना समोर येत आहेत.

त्यामुळे अशा प्रकारांना आळा घालण्यासाठी कठोर उपाययोजना करण्याचा मुद्दा हिवाळी अधिवेशनात उपस्थित करणार असल्याचं खोपडे यांनी सांगितलं तसेच मुख्यमंत्री देवेंद्र फडणवीस आणि राज्य सरकारच्या निदर्शनासही हा विषय आणून देणार असल्याचं त्यांनी स्पष्ट केलं आहे.