सुशील थोरात, साम टीव्ही

अहिल्यानगर : अहिल्यानगर तालुक्यातील देहरे या गावात गेल्या तीन दिवसांपासून तणावाचं वातावरण निर्माण झालं होतं. एका महिलेचं अपहरण करुन तिच्यावर अत्याचार केल्याची घटना समोर आली होती. या प्रकरणी एमआयडीसी पोलीस ठाण्यात या घटनेत असलेल्या तिन्ही आरोपींविरोधात महिलेवर अत्याचार करणे, पळवून नेणे असे गुन्हे दाखल करण्यात आले आहेत.

त्यानंतर, आरोपींचे देहरे गावात अतिक्रमण करून घर आणि दुकाने बांधले असल्याचा आरोप ग्रामस्थांनी केला होता. त्यामुळे आज पोलीस बंदोबस्तात ग्रामपंचायत आणि गावकऱ्यांनी तिघे आरोपींचे घराचे आणि दुकानांचे अतिक्रमण काढण्याची मोहीम सुरु करण्यात आली. तसेच गावातील असे अतिक्रमण हटवणार असल्याची माहिती ग्रामसेवक नंदकुमार साळवे यांनी दिली. या घटनेतील एका आरोपीला एमआयडीसी पोलिसांनी अटक केली असून उर्वरित दोन आरोपी फरार झाले आहेत.

नेमकं प्रकरण काय?

अहिल्यानगर तालुक्यातील देहरे या गावात गेल्या तीन दिवसांपासून तणावाचं वातावरण निर्माण झालं होतं. नगर मनमाड रोडवर असलेल्या देहरे गावातील एका महिलेला मुलाला मारण्याची धमकी देऊन पळवून नेण्याचा प्रकार उघडकीस आला होता. विशेष म्हणजे धमकी देणाऱ्या इसमांची इंस्टाग्रामवर त्या महिलेशी ओळख झाली होती. या प्रकरणी एमआयडीसी पोलीस ठाण्यात गुन्हा दाखल करण्यात आला आहे. या सर्वांनी महिलेचा छळ करून अत्याचार केल्याची घटनाही समोर आली आहे.