कवडीमोल भाव मिळत असल्याने कांदा उत्पादक शेतकरी मेटाकुटीला आला असताना सरकारला अखेर जाग आलीय. नाफेड आणि NCCF आता थेट बाजारसमितीतून कांदा खरेदी करणार आहे,. त्यासाठी येणाऱ्या तांत्रिक अडचणी देखील दूर करण्यात आल्यात. नाफेड आणि NCCF ने थेट बाजारसमितीतून कांद्याची खरेदी करावी, ही गेल्या काही वर्षांपासून शेतकऱ्यांची मागणी होती. तर दुसरीकडे नाफेड आणि NCCF ने नियुक्त केलेल्या सहकारी संस्थांकडे व्यापारी परवाना नव्हता. त्यांना थेट बाजारसमितीतून कांदा खरेदीसाठी तांत्रिक अडचण निर्माण झाली होती. मात्र साम टीव्हीने याबाबत मुद्दा लावून धरल्यानंतर अखेर त्यावर तोडगा काढण्यात आलाय.

नाफेड बाजार समितीतून कांदा खरेदी करणार

- बाजारसमितीतून कांदा खरेदीसाठी नाफेड आणि NCCF च्या सहकारी संस्थांना व्यापारी परवाने दिले जाणार

- सोमवारपासून नाफेड आणि NCCF कडून थेट बाजारसमितीतून कांदा खरेदीचं नियोजन

- खरेदी केंद्र नसलेल्या मालेगाव आणि येवला तालुक्यात नाफेड आणि NCCF चे अधिकारी थेट बाजारसमितीतून कांदा खरेदी प्रक्रिया राबवणार

- बाजारसमितीच्या दर्शनी भागात कांदा खरेदीचे स्थान, दर याचे फलक लावणं बंधनकारक असणार

- शेतकऱ्यांची तक्रार असल्यास आपले सरकार पोर्टलसह लेखी नोंद घेतली जाणार

- गैरव्यवहाराची तक्रार आल्यास केंद्रीय तपास यंत्रणेकडून चौकशी होणार

मात्र नाफेडच्या कांदा खरेदीने शेतकऱ्यांना दिलासा मिळणार का? हाच खरा सवाल आहे. मात्र कांदा खरेदीवरुन सरकारची सगळी नौटंकी सुरू असल्याची टीका स्वाभीमानी शेतकरी संघटनेचे नेते राजू शेट्टी यानी केलीय.नाफेड आणि NCCF च्या जाचक अटी आणि निकष, बाजारापेक्षा कमी भाव यामुळे शेतकऱ्यांनी या कांदा खरेदीकडे पाठ फिरवली होती. त्यामुळे 2 लाख मेट्रिक टनापैकी अवघी 2 हजार क्विंटल कांदा खरेदीच आत्तापर्यंत होऊ शकलीय. रिऍलिटी चेकच्या माध्यमातून साम टीव्हीने ही बाब प्रशासनाच्या निदर्शनास आणून दिली. त्यानंतर कांदा खरेदीतील अटी आणि निकष देखील शिथिल करण्यात आले. मात्र सरकारचें नवे उपाय किती प्रभावी ठरतात हे प्रत्यक्ष कांदा खरेदी सुरू झाल्यानंतरच कळणार.