मुंबई : मुंबईच्या वनराई पोलीस ठाण्याच्या हद्दीतून अवघ्या ३८ दिवसाच्या लहान बाळाचं अपहरण झाल्याची घटना उघडकीस आली आहे. बाळाची विक्री करण्याच्या उद्देशाने हे अपहरण करण्यात आले असल्याचं सांगण्यात येत आहे. बाळाचं अपहरण करणाऱ्या चार जणांच्या टोळीचा वनराई पोलिसांनी पर्दाफाश केला असून बाळाला सुरक्षित आणि सुखरूपपणे त्याच्या आई-वडिलांच्या ताब्यात दिलं आहे.

अपहरण झालेल्या बालकाचा शोध घेण्यासाठी परिमंडळ १२च्या पोलीस उपायुक्त स्मिता पाटील यांच्या मार्गदर्शनाखाली सहा टीम तैनात करण्यात आल्या आहेत. सहा दिवस अहोरात्र मेहनत करत तब्बल ११ हजार रिक्षा चालक आणि एक लाखाहून अधिक मोबाईल नंबर तसेच हजारो सीसीटीव्ही फुटेज आणि तांत्रिक माहितीच्या आधारे आरोपीचा शोध घेण्यात वनराई पोलिसांना यश मिळालं. पोलिसांनी मुंबईच्या मालवणी मालाड परिसरातून चारही आरोपींना अटक केली. सध्या आरोपी हे वनराई पोलिसांच्या ताब्यात असून या आरोपींनी यापूर्वी मुंबईत अशा प्रकारे कुठे लहान मुलांची चोरी करून विक्री केली आहे का याबाबत वनराई पोलीस अधिक तपास करत आहेत.