फैयाज शेख, साम प्रतिनिधी

मुंबई-नाशिक महामार्गावरील आटगावजवळ भीषण अपघात झाला आहे. या दुर्घटनेत दोघांचा मृत्यू झाला आहे. अज्ञात वाहनाच्या धडकेत दोन जीवलग मित्रांचा मृत्यू झाला आहे. दीप भेरे (वय १८) आणि हर्षल कांबळे (वय १९) अशी मृतांची नावे आहेत. दीप भेरे आणि हर्षल कांबळे हे दोघे जीवलग मित्र होते, अगदी जीव-सखा.

"सुख असो की दुःख मैत्रीचा हात कधीच सोडणार नाही" अशी मैत्री असणारे हे दोघे जिवलग मित्र. लहानाचे मोठे एकत्र झाले, सुख-दुःख एकत्र अनुभवली. या दोघांनी मृत्यूच्या वेळीही एकमेकांची साथ सोडली नाही. मुंबई-नाशिक महामार्गावर झालेल्या अपघातात दोघांचा मृत्यू झाल्याने गावात शोककळा पसरली आहे.

दरम्यान ज्या अज्ञात वाहनाने धडक दिली त्या वाहनाचा चालक घटनास्थळावरून पसार झाला आहे. याप्रकरणी मृत तरुणांच्या नातेवाईकांनी शहापूर पोलीस ठाण्यात अज्ञात वाहन चालकाविरोधात गुन्हा दाखल केलाय. "महामार्गावरील सीसीटीव्ही फुटेज तपासून त्या नराधम चालकाला तातडीने अटक करावी," अशी मागणी गावकऱ्यांकडून करण्यात येत आहे.

दुचाकी आणि पिकअपचा भीषण अपघात, एक ठार

वाशिम च्या मालेगाव-मेहकर या राष्ट्रीय महामार्गावरील पिंपरी सरहद्द येथे दुचाकी आणि पिकअप वाहनामध्ये भीषण अपघात होऊन एका युवकाचा जागीच मृत्यू झालाय, तर दुसरा युवक गंभीर जखमी झाला असून, मालेगाव तालुक्यातील तीवळी येथील दोघेही युवक लग्न समारंभ आटोपून परत येत असताना हा अपघात झाला. अपघातानंतर पिकअप चालक फरार झाला असून नागरिकांनी 108 रुग्णवाहिका वेळेवर न पोहोचल्याबद्दल संताप व्यक्त केला आहे.