राज्य परिवहन (एसटी) महामंडळाने बहुचर्चित 'शिवशाही' बससंदर्भात मोठा निर्णय घेतलाय. एसटीच्या ताफ्यात दाखल झाल्यापासून 'शिवशाही' बसने खासगी ट्रॅव्हल्स कंपन्यांना जोरदार टक्कर दिली होती. आता एसटी महामंडळाचा मोठा ब्रॅण्ड असलेली 'शिवशाही' हळूहळू बंद होणार आहे. शिवशाही' चे रुपांतर 'हिरकणी' बसमध्ये करण्यात येणार आहे. (MSRTC to Gradually Scrap Shivshahi Buses, Introduce Hirkani Fleet in Bid to Rebrand State Transport)

एसटी महामंडळ सर्व 'शिवशाही' बस टप्प्याटप्प्याने 'हिरकणी'मध्ये परावर्तित करणार आहे. यामुळे भविष्यात 'शिवशाही' बस रस्त्यावर धावताना दिसणार नाही. एसटी महामंडळाने वातानुकूलित 'शिवशाही' बस 'हिरकणी' बसमध्ये परावर्तित करण्याचे नियोजन केलंय. छत्रपती संभाजीनगरमधील चिकलठाणा येथील मध्यवर्ती वर्कशॉपमध्ये 'शिवशाही' बसचं 'हिरकणी' बसमध्ये रूपांतरित करण्याचे काम युद्धपातळीवर सुरू आहे. तसेच पुण्यातील दापोडी येथे बस परावर्तित केल्या जात आहेत.

का घेण्यात आला निर्णय?

एसटी महामंडळाच्या ताफ्यात ७९२ वातानुकूलित 'शिवशाही' बस आहेत. या सर्व बसचे रुपांतर 'हिरकणी'मध्ये करण्यात येणार आहे. 'शिवशाही' बसमधील वातानुकूलित यंत्रणेमुळे इंजिनवर जास्त भार येत होता. त्यामुळे 'शिवशाही'ची वातानुकूलित यंत्रणा बंद करून 'हिरकणी'त परावर्तीत करण्यात येणार आहे.

त्यामुळे इंजिनवरील भार कमी होणार आहे. शिवशाहीच्या रंगसंगतीत बदल करण्यात येणार आहे. याचबरोबर आसनात बदल केला जाणार आहे. 'हिरकणी'मध्ये ४४ आसने असणार आहेत.

शिवशाही मागे साडेसाती

मुंबई–रत्नागिरी मार्गावर १० जून २०१७ रोजी शिवशाही बस सुरू झाली. तत्कालीन परिवहन मंत्री व एसटी महामंडळाचे अध्यक्ष दिवाकर रावते यांच्या संकल्पनेतून या बस सुरू करण्यात आल्या होत्या. राज्यातील ७५ मार्गांवर शिवशाही धावू लागली. बसमध्ये शयनयान आणि आसन असे दोन्ही पर्याय उपलब्ध करणअयात आले होते.

एसटी महामंडळाने प्रवाशांना लांबपल्ल्याच्या प्रवासासाठी वातानुकूलित, आरामदायी आणि किफायतशीर दरात सेवा देण्यात येत होती. मात्र काही वर्षातच शिवशाही बस मागे साडेसाती लागली. होणारे अपघात अन् झालेल्या दुरावस्थेमुळे शिवशाही बस टीकेची धनी बनत होती.