औरंगाबाद - चुकीचे वीज मीटर रिडींग घेऊन सर्वसामान्य ग्राहकांचा आर्थिक आणि मानसिक छळ करणाऱ्या खाजगी एजन्सीचा महावितरणने (MSEDCL) बंदोबस्त करायला सुरुवात केली आहे. चुकीचे वीज मिटर रिडींग घेऊन महावितरणचे नुकसान करणाऱ्या आणि विज बिल (Electricity Bill) दुरुस्तीसाठी ग्राहकांना नाहक आर्थिक, मानसिक त्रास देणाऱ्या राज्यातील खाजगी सहा मीटर रीडिंग करणाऱ्या एजन्सींचे महावितरणने काम बंद केलं आहे.

हे देखील पहा -

यात औरंगाबाद जिल्ह्यातील १, पुणे जिल्ह्यातील २, वसई, नांदेड आणि अकोला येथील प्रत्येकी एक मिटर रिडींग करणाऱ्या एजन्सीवर कारवाई करण्यात आली आहे. या एजन्सींना काळा यादीत टाकण्याची प्रक्रियाही महावितरणने सुरू केली आहे. राज्यामध्ये महावितरणने नेमलेल्या वीज मीटर रीडिंग एजन्सीकडून चुकीचे मीटर रीडिंग केल्यामुळे महावितरण आणि ग्राहक या दोघांनाही आर्थिक भुर्दंड बसत होता. त्यात ग्राहकांना गरज नसताना मीटर तपासणी करण्यासाठी, मीटर बदलून घेण्यासाठी पैसे भरावे लागत आहे.

त्यासोबतच गरज नसताना महावितरणला कामे करण्याची वेळ आलीय. त्यात महावितरणचे आर्थिक नुकसान होत आहे. त्यामुळे याची पूर्ण चौकशी केल्यानंतर चुकीचे मिटर रिडींग घेतल्यामुळे या नुकसानाला सामोरं जावं लागत असल्याचं समोर आलेलं आहे. त्यामुळे महावितरणने मीटर रीडिंगची अचूक नोंद करण्यासाठी उपाययोजना सुरु केली आहे.

Edited By - Shivani Tichkule