नीट, TET आणि आता महाराष्ट्र लोकसेवा आयोग ..पेपर फुटींच्या या घटनांनी राज्यातलं वातावरण तापलं असतानाच MPSC पेपरफुटीचं धागेदोरे थेट मंत्रालयापर्यंत पोचल्याचा संशय असल्यानं खळबळ उडाली आहे. अन्न व औषध प्रशासन मंत्री नरहरी झिरवळ आणि त्यांचे OSD गणेश देवरे विरोधकांच्या निशाण्यावर आहेत. कारण आरोपी गौरव पाटीलच्या नंदुरबारमधील घरात देवरे भाडेकरू म्हणून राहत होते, असा आरोप करत या कनेक्शनची सखोल चौकशी करावी अशी मागणी ठाकरेसेनेनं केलीय..

दरम्यान गणेश देवरेंनी आपल्यावरचे आरोप फेटाळलेत. आरोपी गौरव पाटीलचा मी भाडेकरू असणं हा निव्वळ योगायोग आहे, असा दावा त्यांनी केलाय.. MPSC मार्फत 22 मार्चला औषध निरीक्षक पदासाठी परिक्षा घेण्यात आली. मात्र या परिक्षेच्या दोन दिवसआधी 20 मार्चलाच व्हॉट्स अॅपवर पेपर फुटल्याचा आरोप परीक्षार्थी ऋषिकेश गांगुर्डे यानी केला. गौरव पाटील यानेही पेपर फुटल्याची तक्रार मेल द्वारे MPSCला 24 जुलैला केली होती. MPSCमधील पेपरफुटी ही सरकारी कृपेशिवाय झालेली नाही. या प्रकरणात झिरवळांना समन्स बजावून चौकशीला बोलवा, अशी मागणी राऊतांनी केलीय..

या प्रकरणात आतापर्यंत आयोगाच्या तीन अधिकाऱ्यांसह सात जणांना अटक केली आहे. फरार असलेली परीक्षार्थी ऋतूजा पाटील हिला नंदूरबारमधून नुकतीच अटक झाली आहे. या गंभीर प्रकरणात आरोपी गौरव पाटील आणि ऋतूजा पाटीलचा प्रेमाचा अँगलही समोर आला होता. MPSC ने ही परीक्षा रद्द केली आहे. कुंपणच शेत खात असेल तर दाद कोणाकडे मागावी ? अशी स्थिती परीक्षार्थींची झाली आहे. सरकारी परीक्षा पारदर्शकपणे कधी पार पडणार ? भ्रष्ट यंत्रणेवर कडक कारवाईचा बडगा उगारला जाणार का? हाच खरा सवाल आहे.