मराठा आंदोलन नेते मनोज जरांगे पाटील यांची नवनिर्वाचित खासदार संदीपान भूमरे आणि अशोक चव्हाण यांनी अंतरावली सराटीत येऊन भेट घेतलीय. उद्यापासून मनोज जरांगे यांची मराठवाड्यात शांतता रॅलीला सुरुवात होणार आहे. जरांगे यांच्या मराठवाडा दौऱ्याच्या पार्श्वभूमीवर अशोक चव्हाण आणि संदीपान भुमरे यांच्या भेटीमुळे राजकीय चर्चाना उधाण आलंय.

दरम्यान हैदराबाद गॅझेट आणि सगे सोयऱ्याची अंमलबजावणी आमच्या मागणीनुसार करावी, अशी मागणी जरांगे यांनी केलीय. जरांगे यांच्याशी दोन ते तीन या विषयावर विस्तृत चर्चा झाली असून आजच्या भेटीमध्ये राजकीय चर्चा झाली नसल्याचं खासदार अशोक चव्हाण म्हणालेत.

मिळालेल्या माहितीनुसार, सोमवारी म्हणजे ८ तारखेला शिंदे समिती हैदराबादच्या दौऱ्यावर जाणार आहे. चार दिवसांचा हा दौरा असणार आहे. शिंदे समिती हैदराबाद गॅझेटबाबत पुरावे जमा करणार आहे. याबाबतची मागणी मनोज जरांगे यांनी केलीय. मराठा कुणबी असल्याचं या नोंदी ऐतिहासिक पुरावे हे सगळं हैदराबाद गॅझेटच्या माध्यमातून जमा करण्यात येतील.

कुणबी आरक्षण लागू करण्यासाठी हैदराबाद गॅझेट मुंबई गॅझेट आणि सातारा संस्थानचे गॅझेट आधार घ्यावा, अशी मागणी जरांगे पाटील यांची आहे. त्यादृष्टीने सरकार काय काम करीत आहेत याची माहिती अशोक चव्हाण आणि संदिपान भुमरे यांनी दिली.