सागर आव्हाड, साम टीव्ही

पुणे : भारतात महिलांवरील अत्याचारात दिवसेंदिवस वाढ होत आहेत.ज्येष्ठांपासून चिमुरड्या मुलीदेखील अत्याचाराला बळी पडत आहेत. महाराष्ट्राच्या मालेगावमध्येही चिमुरडीवर अत्याचाराची घटना घडली. या घटनेने महाराष्ट्रभर संतापाची लाट उसळली आहे. या प्रकरणावरून महाराष्ट्रातील विविध भागात आंदोलने केली जात आहेत. मालेगावतील चिमुरडीवरील अत्याचार प्रकरणावर खासदार नीलेश लंकेंनी पहिली प्रतिक्रिया दिली आहे.

सिंहगड किल्ल्यावर आपला गड, आपली जबाबदारी या उपक्रमांतर्गत भव्य स्वच्छता आणि संवर्धन मोहीम राबवण्यात आली. खासदार नीलेश लंके यांच्या पुढाकारातून आयोजित या मोहिमेत राज्यातील विविध जिल्ह्यांतून आलेल्या शेकडो शिवभक्तांनी उत्स्फूर्त सहभाग नोंदवला.

'गड-किल्ल्यांचे संवर्धन ही आपली जबाबदारी आहे. मी खासदार म्हणून नव्हे, तर शिवरायांचा मावळा म्हणून या मोहिमेत सहभागी आहे, असे खासदार लंके यांनी यावेळी सांगितले. यावेळी लंकेंनी महिलांवरील वाढत्या अत्याचार प्रकरणांवर भाष्य केलं. 'महिलांवर होणाऱ्या अत्याचारांमध्ये मोठ्या प्रमाणात वाढ होत असून आता खऱ्या अर्थाने शिवाजी महाराजांच्या जन्माची गरज आहे, अशी प्रतिक्रिया नीलेश लंकेंनी दिली आहे.

'आपला गड, आपली जबाबदारी' या मोहिमेवर भाष्य करताना नीलेश लंकेंनी सांगितलं की, 'गड म्हणजे दगडांचा ढिगारा नाही, तर स्वराज्याचा आत्मा आहे. भविष्यातील पिढ्यांना इतिहास सुस्थितीत पोहोचावा, यासाठी आम्ही या मोहिमेचा संकल्प केला आहे'.

खासदार लंके हातात झाडू घेऊन स्वच्छतेत सामील

मोहीमेत स्वतः खासदार नीलेश लंके यांनी झाडू घेऊन परिसराची स्वच्छता केली. किल्ल्यावरील प्रमुख परिसरात सौरदिवे, कचराकुंड्या, लोखंडी बाकडे आणि दिशादर्शक फलक उभारण्यात आले. पर्यटकांनी गडावर स्वच्छता राखावी, कचरा फेकू नये, अशी आवाहनपर पाट्याही लावण्यात आल्या.