संजय सूर्यवंशी, साम टीव्ही

राज्यभर गाजलेल्या सक्षम ताटे खून प्रकरणी मोठी अपडेट समोर आली आहे. सक्षम ताटेची प्रेयसी आचल मामीडवार आणि आणि सक्षमच्या आईने जिल्हाधिकारी कार्यालयासमोर अंगावर ज्वलनशील पदार्थ ओतून आत्मदहनाचा प्रयत्न केल्याची घटना उघडकीस आलीये. उपस्थित पोलीस कर्मचाऱ्यांनी त्यांना अडवल्याने अनर्थ टळलाय. आत्मदहनाच्या वेळी आचल मामीडवार आणि सक्षम ताटेच्या कुटुंबासोबत पोलिसांचा वाद आणि धक्काबुक्की देखील झाली.

नांदेड शहरातील जुनागंज भागात 27 नोव्हेंबर रोजी सक्षम ताटे युवकाची हत्या करण्यात आली होती. आंतरजातीय प्रेम प्रकरणातून आंचलचे वडील आणि भावांनी सहकाऱ्यांसोबत सक्षमची हत्या केली होती. या प्रकरणतील सर्व आरोपींना अटक करण्यात आली आहे. घटनेच्या दिवशी इतवारा पोलिस ठाण्यातील पोलीस कर्मचारी माही दासरवाड, धीरज कोमूलवाड यांनी आचलच्या अल्पवयीन भावाला सक्षमची हत्या करण्यासाठी परावृत्त केल्याचा ताटे यांच्या कुटुंबीयांनी आरोप केला आहे.

'सक्षम तुझ्या बहिणीला रोज घेऊन फिरतो. आधी त्याला मार नंतर पोलीस स्टेशनला ये, असं पोलीस कर्मचाऱ्यांनी म्हटल्याचा आचलचा आरोप आहे. या प्रकरणी पोलिसांवर कारवाई करण्याच्या मागणीसाठी आचल आणि सक्षम ताटेच्या कुटुंबीयांनी काही दिवसांपूर्वी वरिष्ठ अधिकाऱ्यांची भेट घेतली. जिल्हाधिकारी , पोलीस अधीक्षक, विशेष पोलीस महानिरीक्षकांना निवेदन देऊन पोलिसांवर कारवाईची मागणी केली होती. आत्मदहनाचा इशारा देखील दिला होता.

सक्षम ताटे प्रकरणात आतापर्यंत कारवाई न झाल्याने आज आचल आणि आणि सक्षम ताटेच्या आईने आज बुधवारी जिल्हाधिकारी कार्यालयासमोर आत्मदहनाचा प्रयत्न केला. आजच कारवाई झाली नाही, तर पुन्हा आम्ही आमचे जीवन संपवू ,असा इशारा आचल आणि सक्षम ताटे त्याच्या आईने दिला.