निकृष्ट दर्जाचं अन्न दिलं गेल्याच्या कारणावरून शिंदे गटाचे आमदार संजय गायकवाड यांनी कॅन्टीनमधील कामगाराला मारहाण केली होती. या घटनेचा व्हिडिओही व्हायरल झाला होता. दरम्यान, या घटनेला दोन दिवस उलटूनही संजय गायकवाड यांच्याविरोधात कोणतीही कारवाई करण्यात आलेली नाही. या घटनेबाबत बोलताना आमदार संजय गायकवाड यांनी कुठलाही पश्चाताप व्यक्त केलेला नाही. उलट, त्यांनी प्रसारमाध्यमांसमोर, आपण काही चुकीचं केलं नसल्याचा दावा केला. दरम्यान, संजय गायकवाड प्रकरणात गृहराज्यमंत्र्यांनी अद्याप कोणतीही तक्रार आली नसल्याचं सांगितलं. गायकवाड यांच्यावर कारवाई होणार की नाही? असा प्रश्न प्रसारमाध्यमांमधून उपस्थित करण्यात आला, यावर फडणवीस यांनी, योग्य कारवाई केली जाईल, असं म्हटलंय.

संजय गायकवाडप्रकरणी देवेंद्र फडणवीस म्हणाले, 'निश्चितच पोलिसांकडून चौकशी झाली पाहिजे. या प्रकरणाची पोलीस चौकशी करतील. याच्या करिता तक्रार दाखल करण्याची आवश्यकता नाही. जर दखलपात्र गुन्हा जर होत असेल तर, त्यासंदर्भात पोलीस योग्य कारवाई करतील', असं फडणवीस म्हणाले.

त्या दिवशी नेमकं काय घडलं होतं?

शिंदे गटातील आमदार संजय गायकवाड यांनी मंगळवारी रात्री कॅन्टीमधून जेवण मागवले होते. डाळभात,चपाती, भाजी, असा साधा मेन्यू त्यांनी मागवला होता. त्यांनी हे जेवण खोलीत मागवलं होतं. जेवणातून उग्र वास येत असल्यामुळे त्यांना संताप अनावर झाला. त्यांनी थेट कॅन्टीन गाठलं. वेल आणि बनियनवर पोहोचत कॅन्टीनच्या वाढप्यांवर हल्ला केला.

लाथाबुक्क्यांनी तुडवलं, शिव्या घातल्या, तसेच ठोशानं तोंड फोडलं. हा प्रकार घडत असताना एकाने या संपूर्ण प्रकाराचा व्हिडिओ शूट केला. या घटनेनंतर विरोधकांनी संजय गायकवाड यांच्यावर टीकेची तोफ डागली. आमदार संजय गायकवाड यांच्यावर हाणामारी, शिवीगाळ, धमक्या देणे अशा कलमांखाली गुन्हा दाखल करण्यात यावा, अशी मागणी सामनातून करण्यात आली आहे.