बुलढाणा : शिंदे गटाचे आमदार संजय गायकवाड यांनी कोल्हापूरचे कॉम्रेड प्रशांत आंबी यांना फोनवरून शिवीगाळ करत जीवे मारण्याची धमकी दिली. बुलढाण्यातील एका लग्नात आंबी यांनी 'शिवाजी कोण होता?' या पुस्तक वाटल्याने संजय गायकवाड संतापले. गोविंद पानसरेंचे काय झालं माहिती आहे ना? तुझी जीभ छाटून टाकीन, अशा शब्दात गायकवाड यांनी आंबी यांना धमकावलं. दोघांच्या संभाषणाची ऑडिओ क्लिप सध्या व्हायरल होत असून राज्यात खळबळ उडाली आहे.

शिंदे गटाचे आमदार संजय गायकवाड पुन्हा एकदा चर्चेत आले आहेत. बुलढाण्यातील आमदार संजय गायकवाड यांनी थेट प्राध्यापक गोविंद पानसरे लिखित 'शिवाजी कोण होता?' या पुस्तकाचे प्रकाशक प्रशांत आंबी यांना फोन करून शिवीगाळ केली.

छत्रपती शिवाजी महाराजांचं अनादर करणारे शीर्षक या पुस्तकाला दिल्याचे म्हणत आमदार गायकवाड यांनी आंबी यांच्यावर शिवीगाळ केली. सोशल मीडियावर व्हायरल होणारी ऑडिओ क्लिप कधीची आहे, याबद्दल स्पष्टता नसली तरी या ऑडिओ क्लिपची साम टीव्ही पुष्टी करत नाही. सोशल मीडियावर ऑडिओ क्लिप व्हायरल झाल्यानंतर आमदार संजय गायकवाड यांची पहिली प्रतिक्रिया देखील समोर आली आहे.

संजय गायकवाड काय म्हणाले?

व्हायरल ऑडिओ क्लिपवर संजय गायकवाड म्हणाले, 'व्हायरल ऑडिओ क्लिप मोडून तोडून तयार करण्यात आली आहे. माझ्या पत्नीला २१ एप्रिल रोजी 'शिवाजी कोण होता' हे पुस्तक देण्यात आलं होतं. तिने पुस्तक घरी आणल्यानंतर मी वाचलं. छत्रपती शिवाजी महाराजांच्या इतिहासाला छेडछाड करण्याचा प्रयत्न झालाय. प्रत्येक पानावर छत्रपती शिवरायांचा एकेरी उल्लेख करण्यात आला आहे. महाराजांवर अनेक प्रश्न उपस्थित करण्यात आले आहेत. छत्रपती शिवाजी महाराजांचा अपमान आम्हाला सहन होत नाही. तो सारखा सारखा डिवचत होता, त्यामुळे मी त्याला शिव्या हासडल्या. महाराष्ट्रात आम्ही छत्रपती शिवरायांचा अपमान सहन करू शकत नाही'.