आश्रमशाळांमधील समस्या आणि प्रशासनाच्या उदासीनतेविरोधात राष्ट्रवादी काँग्रेस अजित पवार गटाचे आमदार नितीन पवार यांनी २८ जुलै रोजी कळवण येथे एकात्मिक प्रकल्प कार्यालयासमोर ठिय्या आंदोलन केले. तब्बल पाच तास आंदोलन करूनही जबाबदार अधिकाऱ्यांकडून समाधानकारक उत्तर न मिळाल्यानं नितीन पवार यांनी तीव्र नाराजी व्यक्त केली. तसेच चांगलेच आक्रमक झाल्याचे पाहायला मिळाले.

आंदोलनादरम्यान, उपस्थित अधिकाऱ्यांना उद्देशून त्यांनी, 'तुम्हाला एवढा माज आलाय का? तो माज मी उतरवतो'. यावेळी त्यांच्या तोंडून असभ्य शब्दही निघाले होते, यावेळी त्यांची जीभ घसरली.

त्यानंतर त्यांनी पोलीस अधिकाऱ्यांनाही फटकाले. 'मटका, २ नंबरचे धंदे, इथे खपवून घेतले जाणार नाही. सगळे अवैध धंदे बंद व्हायला हवेत', असा इशाराही यावेळी त्यांनी दिला. तसेच आश्रमशाळेला जोपर्यंत शिक्षक मिळत नाही, तोपर्यंत शाळा बंदच ठेवा, असंही यावेळी त्यांनी स्पष्ट केलं.

शासकीय आश्रमशाळांना टाळे ठोकण्याचा इशारा

कळवण आणि सुरगणा तालुक्यातील शासकीय आश्रमशाळांमध्ये शिक्षक आणि शिक्षकेतर कर्मचाऱ्यांच्या भरतीचा गंभीर अभाव आहे. यामुळे विद्यार्थ्यांचे शिक्षण ठप्प झाले आहे. शाळा सुरू होऊन २ महिने उलटले तरीही शिक्षक नियुक्ती करण्यात आलेली नाही. त्यामुळे आमदार पवार यांनी पालकांना आपल्या मुलांना शाळेतून घरी घेऊन जाण्याचे आवाहन केले आणि प्रशासनाला 'शिक्षक नसतील तर शाळांना टाळे ठोका', असा रोखठोक इशारा दिला.

प्रमुख मागणी कोणती?

आश्रमशाळांमधील शिक्षकांच्या रिक्त जागा, बाह्यस्त्रोत शिक्षकांची अद्याप न झालेली भरती, जेवणाच्या निकृष्ट दर्जाचा प्रकार, तसेच अन्य मूलभूत सुविधांचा अभाव या प्रमुख मागण्यांकडे प्रशासनाचे लक्ष वेधण्यासाठी हे आंदोलन पुकारण्यात आले होते.