विजय पाटील, साम टीव्ही

सांगली: मिरज येथील शासकीय रुग्णालयाच्या प्रवेशद्वारावर उभारण्यात येत असलेली नवीन कमान कोसळून मोठी दुर्घटना घडली आहे. कमानीचा स्लॅब टाकण्याचे काम सुरू असताना अचानक स्लॅब कोसळला. या दुर्घटनेत सात ते आठ कामगार गंभीर जखमी झाल्याची प्राथमिक माहिती आहे.

स्लॅब कोसळल्यानंतर अनेक कामगार ढिगाऱ्याखाली अडकले. त्यापैकी पाच ते सहा कामगारांना बाहेर काढण्यात यश आले असून, इतरांचा शोध आणि बचावकार्य सुरू आहे. घटनास्थळी जेसीबीच्या सहाय्याने स्लॅबचा ढिगारा बाजूला करण्याचे काम युद्धपातळीवर सुरू आहे. दुर्घटनेची माहिती मिळताच पोलीस आणि रुग्णालय प्रशासन घटनास्थळी दाखल झाले. बचावकार्य सुरू असून, जखमींना उपचारासाठी रुग्णालयात दाखल करण्यात येत आहे. घटनास्थळी नागरिकांची मोठी गर्दी झाली आहे.

दरम्यान, शासकीय रुग्णालयाच्या प्रवेशद्वारावर नवीन कमान उभारण्याचे काम सुरू होते. कमानीच्या बांधकामासाठी स्लॅब टाकला जात असतानाच तो अचानक कोसळल्याने ही दुर्घटना घडल्याची प्राथमिक माहिती आहे. मृतांचा आणि जखमींचा नेमका आकडा प्रशासनाकडून अधिकृतपणे स्पष्ट होणे बाकी आहे.