धाराशिव : दुधाला हमीभाव मिळावा यासाठी राज्यातील काही भागात आंदोलन सुरु आहे. परंतु सरकारकडून अद्याप निर्णय झाला नाही. याचा निषेध करत (Dharashiv) धाराशिव येथे स्वराज्य पक्षाच्यावतीने तर (Nashik) नाशिकच्या येवला येथे प्रहार संघटनेतर्फे आंदोलन करण्यात आले.  (Live Marathi News)

धाराशिव जिल्ह्यातील वाशी शहरात स्वराज्य पक्षाच्यावतीने दुधाला हमीभाव (Milk Price) देण्यात यावा, त्याचबरोबर गाईच्या दुधाला प्रति लिटर ५० रुपये आणि म्हशीच्या दुधाला प्रति लिटर ७० रुपयांचा भाव देण्यात यावा. चारा डेपो चालू करावा. यासह विविध मागण्यांसाठी लाक्षणिक आंदोलन करण्यात आले. यावेळी रस्त्यावरती दुध ओतून तीव्र घोषणाबाजी करण्यात आली. यावेळी स्वराज्य पक्षाचे राकेश उंद्रे, सौरभ सुकाळे, अक्षय चेडे, शंभू गायकवाड, गणेश नलवडे यांच्यासह स्वराज्य पक्षाचे पदाधिकारी कार्यकर्ते यावेळी उपस्थित होते.

('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

हमीभावासाठी प्रहार संघटनेचे आंदोलन
सध्या दुध दरवाढीच्या प्रश्नावरुन शेतकरी आक्रमक होत असून ढासळत्या दूध दराबाबत प्रहार संघटनेतर्फे नाशिकच्या येवला तालूक्यातील एरंगाव येथे मुख्यमंत्री, दोन्ही उपमुख्यमंत्री व दुग्धविकास मंत्री यांच्या पोस्टरला दुग्धाभिषेक घालत अनोखे प्रतिकात्मक आंदोलन करत सरकारचा निषेध केला. दुधाला २५ रुपयांचा दर मिळत असून दुष्काळी परिस्थिती, महागलेला चारा, वाढलेले पशुखाद्याचे दर यामुळे उत्पादन खर्च भरुन निघत नसल्याने सरकारने दुधाच्या दरात वाढ करावी अशी मागणी यावेळी करण्यात आली.