तबरेज शेख

Nashik News: नाशिकमधून मोठी राजकीय वृत्त हाती आलं आहे. नाशिकमध्ये शिंदे गटाचे मंत्री दादा भुसे आणि आदित्य ठाकरे यांची गुप्त भेट झाल्याची माहिती सूत्रांनी दिली आहे. नाशिकच्या त्र्यंबकेश्वर रोडवरील एका खासगी रिसॉर्टवर भेट झाल्याची माहिती मिळत आहे. दोघांच्या भेटीमुळे राजकीय वर्तुळात चर्चांना उधाण आलं आहे. (Latest Marathi News)

सूत्रांनी दिलेल्या माहितीनुसार, शिंदे गटाचे शिवसेनेचे मंत्री दादा भुसे आणि आदित्य ठाकरे यांची गुप्त भेट झाल्याची माहिती समोर आली आहे. नाशिकच्या त्र्यंबकेश्वर रोडवरील एका खासगी रिसॉर्टवर भेट झाल्याची माहिती आहे.

आदित्य ठाकरेंच्या भेटीसाठी दादा भुसे अचानक नियोजित कार्यक्रमातून बाहेर पडले. एका शैक्षणिक संस्थेच्या सुरू कार्यक्रमातून भुसेंनी प्रशासकीय प्रोटोकॉल बाजूला ठेवत रिसॉर्ट गाठलं.

आदित्य ठाकरे आणि दादा भुसे यांची भेट झालेलं रिसॉर्ट बेजे गावातील आहे. प्रशासकीय दौरा नसताना भुसे अचानक मालेगाववरून नाशिकला आले होते.

आदित्य ठाकरेंचा नाशिक दौरा खासगी असल्याची सुरुवातीला माहिती होती. आदित्य ठाकरे स्वतः गाडी चालवत नाशिकला आले होते. आदित्य ठाकरे आणि दादा भुसे यांच्या भेटीची मोठ्या प्रमाणात गोपनीयता पाळण्यात आल्याची माहिती आहे.

तत्पूर्वी, मंत्री दादा भुसे यांच्या गुप्त भेटीवर शिंदे गटाचे नेते, मंत्री उदय सामंत यांनी प्रतिक्रिया दिली आहे. 'एखादी व्यक्ती समोरून आली आणि आम्ही भेटलो, तर त्यात काय? योगायोग असू शकतो. त्याला राजकीय नजरेने का पाहावं? असं प्रश्न करत सामंत यांनी प्रतिक्रिया दिली.