Milk & Onion Price Problem

दुधाचे कोसळलेले दर आणि कांदा निर्यातबंदी विरोधात शिवसेना उध्दव ठाकरे गटाच्या वतीने रास्तारोको आंदोलन करण्यात आलं आहे. नगर-मनमाड महामार्ग अडवत ठाकरे गटाच्या कार्यकर्त्यांकडून राज्य आणि केंद्र सरकारविरोधात जोरदार घोषणाबाजी करण्यात आली. सरकारने शेतकऱ्यांना दिलासा देणारा निर्णय घेतला नाही तर येत्या दहा दिवसात दुग्ध विकास मंत्री राधाकृष्ण विखे पाटील यांच्या लोणी येथील घरावर जनावरांसह मोर्चा काढण्याचा इशारा जिल्हाध्यक्ष रावसाहेब खेवरे यांनी दिला आहे.

दुधाला योग्य भाव द्यावा (Milk) आणि कांदा निर्यातबंदी उठवावी यासाठी शेतकरी संघटनांसह आता शिवसेना उद्धव ठाकरे गटही आक्रमक झाला आहे. अहमदनगर जिल्ह्यातील नगर-मनमाड महामार्ग एक तासभर अडवत रास्ता रोको आंदोलन (Protest)करण्यात आलं. त्यामुळे या मार्गावरील वाहतूक काहीकाळ ठप्प झाली होती.

('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)

जिल्हाध्यक्ष रावसाहेब खेवर आणि शिर्डीचे माजी खासदार भाऊसाहेब वाकचौरे यांच्या नेतृत्वात करण्यात आलेल्या या आंदोलनात मोठ्या संख्येने ठाकरे गटाचे कार्यकर्ते आणि शेतकरी सहभागी झाले होते. सरकारने तातडीने शेतकऱ्यांना दिलासा देणारा निर्णय घेतला नाही तर येत्या दहा दिवसात दुग्ध विकास मंत्री राधाकृष्ण विखे पाटील यांच्या घरावर जनावरांसह भव्य मोर्चा काढण्याचा आणि विखे पाटलांना दुग्धभिषेक घालण्याचा इशारा ठाकरे गटाचे जिल्हाध्यक्ष रावसाहेब खेवरे यांनी दिला आहे.